Shillong, Naiwieng 24: Ka kynhun ialehkai Football jong ka Meghalaya kala iakhaid noh da 1-1 bad ka Assam bad kane kala pynlong ia ka Meghalaya ban ioh rung sha kawei pat ka Round jong ka Senior Men’s National Football Championship jongka Santosh Trophy 2024-25 kaba la long ha Nalbari, Assam, hynne ka sngi u Blei.
ka Meghalaya kaba la jop ia ka Nagaland bad Arunachal Pradesh bad iakhaid bad ka Assam kala ioh khur 7 point bad kala long ka lahduh ha ka Group ban ioh rung sha kawei pat ka Round jong ka Santosh Trophy.
U Coach ka Meghalaya u Bah Hering Shangpliang ula pynmih bujli tang uwei u nongialehkai da kaba wanrah ia u Baiaikara Swer ha ka jaka jongu Kevin Rymbai.
Ka Meghalaya kala tip thikna ba ha kane ka jingiakhun ka donkam tang ban shu iakhaid ban ioh rung sha kawei pat ka Round bad ha ka minit kaba 56 u Damanbhalang Chyne ula thep ia ka kol na ka bynta ka Meghalaya.
Hynrei hashwa ban kut ka jingialehkai, ka Assam kala ioh ia ka penalty haka minit kaba 88 bad u Dipu Mirdha khlem da pynlehnoh ei ula thep ia katei ka kol bad kane ka jingioh thep ka Assam kala ai mynsiem ia ki ban ialehkai bha ban ioh thep sa kawei ka kol hynrei ki nongialehkai ka Meghalaya kila ialehkai bha bad iengskhem ban iada bad ban ym ailad ia ka Assam ban jop ha kane ka jingiakhun bad kumta ka jingialehkai kala kut noh haka jingiakhiad da 1-1.
U Damanbhalang ula ioh ia ka nam Player of the Match.
Ha kane ka jingiakhun la leit ban ai mynsiem ia ki nongialehkai ka Assam da u President ka Meghalaya Football Association u Bah Hamletson Dohling, u General Secretary ka MFA Bah Sunesh Syiem, u Nongaibuit ka Sorkar Meghalaya u Bah HM Shangpliang, kiba la leit sha Nalbari ban ai jingkyrshan iaka kynhun ialehkai ka jylla.
Ka Meghalaya kala shah pynhap ha ka Group B kaba don ia ka kynhun ialehkai jongka Goa, Tamil Nadu, Kerala, Delhi bad Odisha.
Ki nongialehkai ka Meghalaya hynne ka sngi ki kynthup ia u Siwel Rymbai (GK), Overkindness L Mawnai, Arlangky Nongsiej, Donborlang Nongkynrih (sub Banraplang Pyngrope 45’+4), Wanboklang Lyngkhoi, Aibiangmame Nongneng (sub Fairming Suting 77′), Robertson Khongriah, Fullmoon Mukhim, Damanbhalang Chyne, Baiaikara Swer, Donlad Diengdoh (sub Aenam Jyrwa 90′).
Ka Meghalaya kan iakhun pyrshah ia ka Tamil Nadu, ha ka 15 tarik u Nohprah
Ka Meghalaya pyrshah ia ka Kerala ha ka 17 u Nohprah
Ka Meghalaya kan iakhun bad ka Delhi, ha ka 19 tarik u Nohprah
Ka Meghalaya kan iakhun pyrshah ia ka Goa, ha ka 22 tarik u Nohprah
Ka Meghalaya kan iakhun bad ka Odisha ha ka 24 tarik u Nohprah
