Shillong, Naitung 23: U Myntri Rangbah ka Jylla Conrad K. Sangma ha ka sngi Palei ula pyllait ia ki projek kam pynroi kiba thymmai hapoh ka Chief Minister’s Special Development Fund (CMSDF), da kaba ai jingiarap ia ki skul, ki kynhun jong ka imlang sahlang, ki kynhun ialehkai bad ki shnong ki thaw ka Jylla.
Ha ka jingialang kaba la long ha ka iingsah jongu Myntri Rangbah ha Shillong, u Conrad ula sam ia ki ‘Sanction Letter’ na ka bynta kiba bun ki sienjam ha ki shnong ki thaw da ka jingthmu ban pynbha ia ka pule puthi, ki jingtei kiba iadei bad ki kam ialehkai, ki jingdonkam u paitbah bad ka jingai jingshakri ia ka imlang sahlang.
Kine ki projek kiba la ai jingmynjur ki kynthup ia ka jingtei ia ki iingskul, ki kamra skul, ki Community bad Multipurpose Hall, ki ophis treikam jong ki kynhun ha ki shnong, ki jaka leit bar, jaka ialehkai basketball, ki jingtei ban pynbiang ia ka umbam umdih, ki jaka sait ryngkat bad ka jingkyrshan ia ka jingai jingshakri da ki Ambulance, ki tiar ialehkai bad ki jingdonkam ha ka pule puthi.
Napdeng kine kiba ioh jingmyntoi ki kynthup ia ka Synjuk Rangbah Shnong Dorbar Raid Mathan, Chibak Agalgittim Sports & Cultural Club, Laitnongrim Upper Primary School, Church of God (M&A), Sohryngkham, Rangthong Cultural Club and Sports Association, Reach Shillong Ministries, Mizo Women Welfare Society, Umpling Presbyterian Secondary School, St. Anthony’s Higher Secondary School ha ryngkat bad ki nongialam na ki shnong na kylleng ki district.
Haba kren ha ka jingialang, u Conrad Sangma ula ong, ba ka CMSDF kala kylla long kaba kongsan ban shimkhia mardor ia ki jingdonkam kiba kongsan ia ki shnong ki thaw da kaba kyrshan ia ki projek kiba ktah beit beit ia ka kyrdan ka jingim ki briew.
Ula ong, ba ka sorkar ka iengskhem ha ka jingkular ban pynthikna ban don ka jingroi jingpar kaba mar katjuh ha kylleng ka Meghalaya da kaba bei tyngka ia ki projek kiba donkam kyrkieh hapoh ka por kaba la buh khnang ba ki shnong ki thaw kin lah ban ioh jingmyntoi khlem ka jingpynslem.
Ha kane ka prokram la wan ban iashimbynta da kiba ioh jingmyntoi, ki nongialam shnong, ki nongmihkhmat bad ki ophisar na ki tnad bapher bapher, kiba lah ong ba kane ka jingai jingiarap kin pynkhlain ia ki shnong ki thaw bad ban pynbha ia ka jingtei kiba donkam jong ki paitbah ha kylleng jong ka jylla.
