Tura, Naitung 23 : Arngut ki briew la suba ba kila iap bad arngut pat kila mynsaw ha ka jingpluh ka Iingsah bad ki dukan ba syndah ha Iew Rajabala, West Garo Hills, ha ka sngi Palei.
Kat kum ki khubor Pulit, kine kiba iap la tip kyrteng u Rajnikant Bhomik bad ka kurim Kamala Kanta Bhomik. Ka Khun bad u khusniew kila mynsaw na kane ka jingjia bad la pynkit mar mar ia ki sha hospital ban ioh jingsumar.
Kane ka ding kala bam duh ia ka Longiing ki Bhomik nalor ki artylli ki dukan kiba don ha syndah.
U Superintendent of Police ka West Garo Hills Abraham T Sangma ula iathuh ba ki borkhmih ki dang tohkit ia ki daw jong kane ka jingjia.
