Shillong, Naiwieng 14: Ka jingthmu jong ka Prime Meghalaya ka long ban ïarap ha ka ban plie lad plie lynti ïa ki nongseng kam lajong ba kin lah ban ïeng ha la ki jong ki kjat.
Ia kane la ong da u Myntri Rangbah ka jylla Conrad K Sangma haka prokam sam jingiarap sha ki 50 tam ki nongseng kam lajong kiba la ïoh ka jingkyrshan pisa na ka sorkar jylla ba kin seng ïa ki kam ki jam jong ki.
Ha kane ka sngi la pynbna ruh ba kito kiba la jop ha ki jingiakop jong ka Prime Meghalaya, ki la ïoh T.50 lak khnang ba kin lah ban seng ïa ki kam ki jong ki bad kiwei kiwei ki la ïoh T.10 lak, T.5 lak, T.3 lak bad ter ter.
Haba kren ha kane ka sngi U Conrad u la ong ba ka jingbuh ïa ka skhim Prime Meghalaya ha ki lai snem ba la dep ka la long kaba eh shibun bad la hap ban pynkylla ïa ka jingtrei jong ka khnang ba kiei kiei kin ïaid beit ïaid ryntih.
U la ong ba ka jingthmu jong ka Prime Meghalaya ka long ban ïarap ha ka ban plie lad plie lynti bad ban ïarap ïa ki nongseng kam lajong ba kin lah ban ïeng ha la ki jong ki kjat.
“Ka jingdon jong ki nongshong shnong kiba lah ban trei kam lajong bad ban seng ïa ki kam jong ki kan ïarap shibun ïa ban kyntiew ïa ka ïoh ka kot jong ka jylla bad lada ka jylla ka kwah ban long kaba nyngkong napdeng ki jylla ba bun ha Ri India donkam ban don da ki briew kiba trei bad kiba seng ïa ki kam lajong” la ong u Conrad.
U Conrad u la ong ba ka jingdon jong ki seng ba trei ïa la ki jong ki kam, kidei tang ma ki kiba lah ban kyntiew ïa ka ïoh ka kot hapoh ka jylla bad ka jindon jong ka Prime Meghalaya ka plie lad iaka sorkar ban wanrah ki lad lynti kumno ban iarap iaki nongsengkam lajong.
U la ong ba ha Meghalaya ki briew ki kren shaphang ka jingkyrduh kam bad la pynsngew ba kane ka rukom pyrkhat kadei ka rukom pyrkhat khim jingmut bad ki paidbah kim dei ba khmih ban ïoh kam tang na ka sorkar hynrei maki ruh ki don ia ka bynta kaba khraw ha kaba ai kam ïa kiwei da kaba ki seng ïa la ki kam bapher bapher.
“Ki nongseng kam kim dei ki nongwad kam hynrei kidei ki nongai kam bad kane kadei ban long ka thong jong ki nongshong shnong naka bynta ban kyntiew iaka ioh ka kot ha ki snem ban wan naka bynta ka jingmyntoi jong baroh lang” la ong u Conrad.
