Shillong, Rymphang 18 : Ka Khasi Student’s Union (KSU), Tyrsad Circle ha ka sngi Saitjain, kala sam jingiarap da ki kot skul sha ki 150 tylli ki longiing na ki san tylli ki Shnong ka thain, kum ka jingkyrshan ia kine ki Iing ba kin lah ban phah skul iala ki khun.
Kine ki longiing ki dei na ka shnong Mawlum Tyrsad , Mawponghong, Phanñiewlah Rum,Phanñiewlah Neng bad Mawsadang.
Ia kine ki jingiarap la aiti da u President ka seng samla Banlumlang Rani bad u Organising Secretary Poster Rynjah ha ka jingiadon ryngkat ki dkhot ka Circle bad ki Unit kiba hap hapoh ka Circle.
Kane ka jingiarap jong ka seng ka long kum shibynta ban ia don ryngkat lem bad kine ki Longiing ha kum kane ka por ha shwa ba ki khun jongki kin bteng biang ia ka jingleit skul.
Ki Longïing kiba la ioh jingiarap ki dei kiba la jied kyrpang da ki Nongialam na kitei Shnong.
“Ngim don shibun ban iarap iaphi hynrei kum ka dak ban kyrshan lem iaphi kum ha kane ka por ba ki khun jongphi kin bteng ban leit skul ,ngi ngeit kan iarap ban pynsting iaphi khamtam lei ha kum kane ka por ba phi ruh phin dang pynkhreh sa ha ka thied ia ki dawai thung phan,sboh bad kumta ter ter” ong u samla Banlumlang.
“Ngin dang iai don ryngkat bad phi ki nongshong shnong ka thaiñ bad ngin dang iai bteng ban ai ka jingiatrei lang bad ki nongshong shnong la ka long ha kano kano ka bynta” ula bynrap.
