Shillong Naitung 03: Ka Ramakrishna Mission Vivekananda Cultural Centre hynnin ka sngi saitjain, ka la sam certificate sha ki samla pule kiba la pyndep iaka jingpule ba ar bnai halor ka Computer Science bad Language Studies ha ka jingialang kaba la long ha nongbah Shillong.
Ha katei ka sngi la sam 1400 tylli ki certificate sha ki samla pule kiba la pyndep ban ioh jingpyntbit ha ki ar tylli ki sobjek bad ia kane ka jingai hikai la sdang ha u Jymmang bad Jylliew.
Kila don haduh 1700 ngut ki samla pule kiba la wan ban shim ia ka jingai jinghikai kiba kynthup ia ki samla na kylleng ki jylla jong ka Thaiñ shatei lammihngi.
Ha ka por mynstep u Regional Director, Atomic Minerals Directorate for Exploration & Research, NER Shillong u Dr. Prakhar Kumar kum u kongsan katba haka jingialang kaba la long ha ka por mynsngi, u Principal & Secretary Institute of Hotel Management Shillong, u Vijay Kumar ula shim ia ka bynta kum u kongsan.
U Dr Prakash u la iaroh iaka Ramakrishna Mission Vivekananda Cultural Centre kaba la ai jinghikai kyrpang ia ki samla haka liang ka Information & Technology bad ula kyntu ia ki samla ba kidei ban long kiba trei shitom, kiban skhem iala ka nongrim na ka bynta ban kyntiew iaka roi ka par jong ka ri.
Katba u Vijay Kumar u la kyntu ia ki samla ba kin pyndonkam hok ia la ki sap ka phong da ka jingthmu ban kyntiew ia ka bha ka miat jong ki paidbah ka ri.
Ha kane ka sngi la ioh ruh ia ka jingkren na u Secretary, Ramakrishna Mission, Shillong u Swami Hitakamanandaji Maharaj, u Deputy Centre-In-Charge, Brahmachari Vairagyachaitanya bad kiwei kiwei.
Ka Ramakrishna Mission, Shillong kala pyntip ba haduh mynta, kala lah ban ai jinghikai haduh 6000 ngut ki samla ha ka shi snem haka Computer kata da kaba phiah ban pynlong haduh 5 sien iaka jingai jinghikai.
