Dei ban pynduh noh ia ka thungkam tang iala ki bahaiing ne ba ithuh ithaw bad ka bamsap
Shillong, Nailur 19 : Ka Khasi Students’ Union (KSU) ha ka sngi Palei, kala sam ia ki kot lyngkdop ban pynshai ia ki paidbah halor ki 20 tylli ki mat ba donkam ban shim ha ka ban pynthymmai ia ka rukom treikam jong ka Meghalaya Public Service Commission (MPSC) ban lah pynkut noh ia ka jing jied tang iala ki bahaiing hasem bad ba ithuh ithaw nalor ka bamsap ha ka jingthungkam sorkar.
Kine ki 20 tylli ki mat jingpynkylla ki kynthup ia ka jingthung ia u Chairman bad ki dkhot ka Commission kiba la biang kyrdan ki bym don jingiadei bad ki kam sain pyrthei, ban pynbna manla u snem ia ka nongkynti bad ki ram ki shah jong ki shakri Sorkar ba kynthup ia u Chairman, ki dkhot bad baroh ki nongtrei kiba trei hapoh ka Commission bad ban pynkha ia ka Vigilance and Anti-Corruption Directorate.
La ong ba ki nongaplai kam ki dei ban long ki nong Meghalaya bad kiba hap tip ia ka ktien Khasi bad Garo haba aplai ia kino kino ki kam ha MPSC, ban pynlong ia ka combined competitive examination ia ki kam kiba dei kajuh ka jingsiew bad ka kyrdan, MCS/MPS bad kiwei ki post dei ban pynlong manla u snem, dei ban pynmih ia ka calendar ba man u snem ia ki sngi ba kongsan ban pynlong eksam da ka Commission.
Ka KSU kala ban jur ia ka jingdonkam ban pynmih paidbah ia ki marks ba ioh da ki nongaplai kam ha kino kino ki eksam, kiwei kiwei ki test bad ki personal interview jong ki kam bala pynlong da ka Commission, ym dei ban pynkylla ia ki roll number jong ki kyrtong hapdeng ka jingiakhun kam, ym ban ban pynkylla ia ka rukom thungkam shisien bala sdang ki kam, dei ban ai ia ki carbon copy jong ka ORR sheet sha ki kyrtong, pyllait iaki answer key hadien ka eksamin bad ban buh da ka por na ka bynta ban tynjuh pyrshah ia ki answer key.
Kala ai jingmut ruh ba ka jingpyniaid ia ki kam thungkam ka dei ban dep hapoh ka 6 bnai naduh ka sngi ba pynmih ia ka jingpynbna lait kam, ban pynduh noh ia ka personal interview jong ki Grade B, C bad D, dei ban ring video ia ka interview jong ka Grade A, dei ban pyllait paidbah ia ka kaiphod bas hi sien shisnem jong ka Commission, dei ban pynthikna ba ki jingkylli kim dei ban lait tuh, pynkha ia ka Grievances Cell hapoh ka Commission, dei ban buh ia ki separate cadre ia ka Meghalaya bad ka jing leh test daki kor computer hadien habud.
Ka kot lyngkdop ka ong ba ka KSU ka thrang ia ka jingthungkam kaba lehhok bad ba shai ha baroh ki kam Sorkar bad kam shimet bad ban pynkut noh ia ka jingthungkam tang iala ki bahaiing hasem ne ki ba ia ithaw ithaw.
Kine ki jingai jingmut ki dei ia kaban pyntreikam noh mardor ban pynkylla thymmai, pynbeit bha bad pynwandur thymmai ia ka rukom treikam jong ka Commission bad ka Jylla baroh kawei kaba la dap da ki kam bym lehhok, jied bahaiing bad ibein ipoh, kala ong.
Ka KSU ka ong ba kala shem ba ha palat 50 snem naduh ba mih ka Commission, kam shym la don ka jingkylla lane jingpynkylla ia ka 1972 Regulation kaban lah pynbit pynbiang ia ka jingdonkam jong kane ka juk ba mynta bad kam shym la don ruh ki rule thungkam lane rule esam ban wanrah ia ka jinglong kumjuh ha ka jingpyniaid ia ki eksamin thungkam, kaba lam sha ka jingleh bym hok bad kaba shong beit ha ka mon jong ka Commission.
Ha kajuh ka por, ka KSU kala dawa ia ka Sorkar Jylla ba kan pynkylla ia ki kyndon treikam jong ka Commission bad ban wanrah ia ka rule thungkam bad ialeh eksam kaba long kumjuh nalor kiwei kiwei ki jingpynkylla kiba donkam ban kyntiew ia ka Commission.
