Aizawl, Jymmang 25: Ki pulit ka Mizoram kila sdang ia ka kam ban leit shaw noh ia ki lai ngut ki kynthei Mizo kiba sahkut ha Syria kaba dang don hapdeng ka thma.
Kine ki Kynthei ki dei kiba leit trei kum ki shakri iing briew bad mynta kila mad ia shibun ki jingeh. Kat kum ka khubor, kine ki kynthei kila leit sha Syria ha u bnai Naiwieng 2022.
Na ka liang ka Indian Embassy ha Syria, kala pyntip ia ka Sorkar Jylla halor kane ka kam.
Ka jingialang jong ki Heh ka Embassy bad ka Ministry of Foreign Affairs ka Syria kala long ha ka 19 tarik Jymmang bad la dep phah ia ka legal notice sha ki nongaikam jong kine ki kynthei Mizo.
Kane ka jingai legal notice kala mih hadien ba ka Agency ba thungkam kala dawa ban siew mar $2500 kawei namar ka jingkwah leit phai noh shiteng por, kaba long kat kum ka soskular kontrak.
Hynrei, namar ka jingtuklar jong ka Indian Embassy bad ki bor Sorkar ka Syria, kane ka Agnecy kala mynjur ban sa pynbeit noh da kiwei ki ban bujli ia kine ki kynthei Mizo.
U Myntri Rangbah ka Mizoram Lalduhoma bad u Myntri kam Pohiing K Sapdanga kila shim khia bha ia kae ka kam bad kila peitpyrman hi dalade ia ka jinglong jingman bad ka jingiaid ka kam.
