Nongkasen, Nailar 17: U President ka HSPDP Mawthadraishan u ba dang shu ieh ïa ka shuki u Bah Damien Lyngdoh Marshiangbai, ha ka sngi ba ar u la pynïasoh noh ialade bad ka Seng UDP Mawthadraishan.
Ryngkat bad u Bah Damien, u ba la ïakhun ïa ka elekshon MDC ha u 2019 na ka HSPDP, la don ruh 136 ngut ki Nongbud bad ki paidbah kiba la pynïasoh sha ka UDP. Kine baroh ki dei na ka Shnong Nongkasen.
La pdiang sngewbha ïa u Bah Damien bad kine ki 136 ngut, ha ka jingïalang ba la pynlong ha Ïingdorbar Shnong Nongkasen, ha kaba la ïadon lang u MLA ka Mawthadraishan, u Bah H.B Nongsiej, u ba long ruh u Myntri ka Sorkar Jylla. La ïadon lang ruh kiwei kiwei de ki Nongïalam jong ka Seng ryngkat bad ki nongkyrshan ka UDP.
U Bah Damien u la ïathuh ba kine ki 136 ngut ki dei kiba la ai da ki kyrteng ban pynïasoh sha ka Seng UDP. Hynrei ki dang bun kiwei pat kiba la kwah ban pynïasoh ym tang na Nongkasen, hynrei na kiwei kiwei de ki Shnong ruh kumjuh. Na ka bynta jong kine, yn sa nang pynrung hadien ba la shim bad rejistar ïa ki kyrteng jong ki.
U Bah H.B Nongsiej ruh u la ïathuh ba ha kylleng kylleng ki Shnong jong ka Mawthadraishan Constituency ki la pyntip sha u ba ki kwah ban pynïasoh noh sha ka UDP.
Ula pyntip ba na ka liang jong ka Seng ka la pynkhreh ban pynrung dkhot noh ïa ki ruh ha ka por ba biang, ynda la ïa pynbeit bha bad ki Unit jong ka UDP jong ki shong ki thaw ba ki sah.
