Gangtok, Naiwieng 23 : Ka kynhun ialehkai phutbol ka Tnad Meghalaya Police kala ioh rung sha ka semi phainal jong ka Quasquicentennial Invitation NorthEast & East Zone Football Tournament hadien ka jingpynliem ia ki Pulit ka Mizoram ha ka jingialehkai ba hynne ka sngi Balang
Ka shimpor tang ar minit jong ka kylla step ba ki Pulit ka Mizoram kila ioh ban thep kol lyngba u Lalnunsanga hynrei u Everywell Khongjee jong ka MLP ula ioh pynphai ia ka kol bad ka kylla step kala kut ha ka jingiakhaid ba mar 1-1 kol.
Ha ka jingiakhun jong ka kylla miet, ka Mizoram kala ioh biang ban tam shakhmat da ka jingioh thep ia ka kol ha ka minit ba 67 lyngba u Valpuia hynrei daka jingiakhun tyngeh, ka Meghalaya kala ioh ban pynphai biang ia ka kol ha ka minit ba 84 lyngba u Heswanwell Lyngdoh Marshillong, kaba la pynkut ia ka jingiakhuh ba 90 minit da 2-2 kol.
Ha ka jingiashut penalty, ka Meghalaya kala jop da 5-4 kol. Ka Meghalaya mynta kan iakynduh sa ia ki Pulit ka Manipur ha ka jingialehkai semi phainal ban long la sngi thohdieng.
