Nongpoh, Naiwieng 24 : Ki Samla Pule Khasi Students’ Union- Regional Institute of Science and Technology-University of Science and Technology (KSU RIST-USTM) kila dawa ia ka Sorkar Jylla ba kim dei shuh ban pynlong langknia ia ki paidbah ha Khappud da ka pynbeit sted noh ia ka jingiapynbeit pud.
Ka KSU-RIST-USTM hapoh ka jingialam u President Calvin Thongni, kala buh ia kane ka jingdawa haba iashimbynta lang bad ka KSU, ha ka jingiathang mombiti bad sieh lama iong kum ka dak ban kyrshan bad sngewlem ia ki bahaiing hasem jong ki 5 ngut ki riew paidbah kiba shah siat iap ha ki Pulit Assam ha shnong Mukroh, West Jaintia Hills District.
Ia kane ka jingthang mombiti la pynlong ha khyrdop ka USTM ha kaba ki samla pule bad ruh ki nongshongshnong na Killing bad Baridua bad ka KSU-Northern Border Area kila wan ban iashimbynta ban iasngewsih lang halor ka jingduh ia kine ki mynsiem briew.
Ha kane ka jingialang, u President ula ong ba kane ka jingsiat iap ki Pulit Assam ia ki nong Meghalaya ka dei kaba leh khlem da pyrkhat bad pynbahkhlieh ia ka Sorkar Jylla halor ka jingpynlong ia ki nongshongshnong ha khappud kum ki langknia bad namar ka jingbym pynbeit kloi kloi ia ka jingiakajia pud.
