Shillong, Iaiong 27: Ka Shillong Lajong FC kala long ka kynhun kaba lai ban ioh rung sha ka Semifinal jong ka Shillong Premier League 2023 hadien ba kala pynrem ia ka Sawmer SC da 4-0 hynne ka sngi Saitjaiñ, ha ka jingiakhun kaba la long ha SSA Stadium, First Ground, Polo.
Hadien 6 sien jong ka jingiakhun ka Lajong mynta kala kamai 12 point bad ka duna shi point ia ka Mawlai SC kaba don ha ka kyrdan kaba 2 ha ka SPL, katba ka Sawmer kala neh hi tang da kaba kamai 3 point bad kala duh ban rung sha ka semifinal.
Mar ia sdang ka jingiakhun ka Lajong lyngba u Deibormi Tongper ula ioh thep ia ka kol ha ka minit kaba 14 bad hadien kane, ha ka minit kaba 18 u Wadajied Kynsai Ryngkhlem ula thep ia ka kol bad ula ioh thep biang ia ka kol ka baar ka jongu ha ka minit kaba 77 bad u Gladdy Kharbuli ula thep ia ka kol ha ka minit kaba 24.
Ha ka sngi Nyngkong ka jingiakhun ha ka SPL kan long hapdeng ka Rangdajied United FC pyrshah ia ka Langsning FC ha ka por 3:15 mynsngi.
Kumba long mynta ka Rangdajied ka don ha ka kyrdan kaba nyngkong bad kala ioh rung sha ka Semi Final katba ka Langsning pat kan ialeh ban ialehkai bha na ka bynta ban pynthikna ba kan dei ka kynhun kaba 4 ban ioh rung sha ka Semi Final.
