Nongpoh, K’lyngkot 25 : Arngut ki Longkmie kiba dei shikmie shikhun, kila iap katba u Kpa bad I Khunksiew kila mynsaw jur haba ka kali maruti alto ba ki iashong, kala leit rung hakhrum jong ka trok kaba dang kylliang taiar ha surok NH-6 ha ka shnong Mawdiangum, Nongpoh.
Ki Pulit ki iathuh ba kine ki shi-iing kila shong ha ka maruti alto ML05-Y-4464 bad ki dei kiba dang wan na Umsamlem ban leit sha 20 mile. Hynrei la ong ba haba poi ha Mawdiangum, marjan ka Bajah Showroom, kane ka maruti alt kala leit tynrah ia ka trok AS01-RC-5327 kaba pynieng harud surok ban bujli ia ka taiar dien kaba la pei lyer.
Namar ka jingjam ka jingleit tynrah, kane ka maruti alto kala rung sha khrum trok bad sahkut hapoh ka trok.
Ki Pulit ki iathuh ba ki briew kiba don ha ka maruti alto ki kynthup ia u Bah Khem Nongrum (66) uba dei u Kpa ka Iing ba niah ia ka kali, I kurim Kong Lucia Nongsiej (45), ka khun kong Ridahun Nongsiej (21) bad I Khunlong Baphindahun Nongsiej ba dang 2 snem.
Ki Pulit ki iathuh ba ia ki rangbah la pynkit sha Civil Hospital Nongpoh da ka kali ki Pulit bad ka kali ka NHAI katba ia I Khunlung la pynkit sha Bethany Hospital, Nongpoh da ki paidbah.
Ki iathuh ba arngut kata I kong Ridahun Nongsiej bad Lucia Nongsiej, la pynbna ba kila khlad noh bad ia ka met jong ki lah pynkynriah sha ka jaka buh metiap jong ka Civil Hospital ban pyndep ia ka post mortem.
Ki Pulit kila hiar tohkit ia kane ka jingjia bad kila tan noh ia ka maruti alto sha thanad ban leh ia kaba donkam.
