Shillong, Jylliew 13 : Ka Khun Hynniewtrep National Awakening Movement (KHNAM) hynne ka sngi Ba-ar, kala dawa ia ka Sorkar Jylla ba kan bat iala ka jong ka jingkular ba kan pyntreikam ia ka roster system nangne shakhmat bad ban pynbna ia ka 10 tarik Jymmang 2022 kum ka sngi ban sdang ka jingpyntreikam.
“Ngi dawa ia ka Sorkar ba kan burom iala ka jingkular ba kan pyntreikam ia ka roster system naduh mynta shakhmat kumba la rai ha ka jingialang ki seng sain pyrthei da kaba shu pynbna ia ka 10 tarik Jymmang 2022 kum ka sngi sdang ban pyntreikam bad ban nym pynmih jyrwit jyrwat shuh ia kane ka kam da kaba ai jingkynthoh ba ialam bakla” ong u Working President ka KHNAM Bah Thomas Passah.
Ula ong ba ka jingkynthoh ba dang shen jong u Myntri Rangbah Conrad K Sangma ba ong ba “ka roster ka dei ka kam ba iaibteng bad ba ka jingbteng ka sdang naduh u snem 1972” ka dei kaba pynkulmar jingmut.
“Naba ia ka roster register & accounts la buh jingthoh naduh u snem 1972 shakhmat bad ka jingbuh jingkhein ia ka thungkam thungjam kala sdang naduh utei u snem, ka roster khlem artatien ka dei ka kam ba bteng naduh utei u snem” ong u Bah Passah haba bynrap “Namar kata, ngi sngew ba ka jing pynkylla ia ka OM bala pynmih da ka Sorkar kam dei kaei kaei ruh hynrei kajuh ka roster bala treikam naduh ki snem barim bala shu pynkylla thymmai”.
U bah Passah ula ong ruh ba ka jingkren u Myntri Rangbah ba ka jingpynbna laitkam kan sdang naduh u serial number kat kaba ioh ia ka jingkhein naduh u snem 1972 hynrei kan sdang naduh ba nyngkong lada ym don jingkhein, ka long kaei kaei kaba hap pyrshah jur.
Ula ong ba ka KHNAM ka kyntu ia ka Sorkar ban pynthikna ba ka jingpynbna laitkam ka dei ban sdang naduh 1, kaban long naduh u bnai Jymmang 2022 haba phai sha baroh ki jait kam ba lait.
Ha kajuh ka por, u Bah Passah ula ong ba ka KHNAM kam lah mutdur ba kumno kiwei ki seng sain pyrthei kum ka UDP, HSPDP bad Congress kim shym la kynthoh eiei ne kren eiei halor kane ka sienjam ba mynta jong ka Sorkar.
Pule lang ia kane: Ujor ka KSU sha ka Tnad Forest ba shyrkhei ka khlong shyiap be-ain ha Wah Iewsier
