Shillong, Jylliew 14: Ka kynhun ki runar ka bym lah ban tip, kala prong tuh ha kawei ka dukan die mobile phone hynne ka step sngi ba-ae ha Motphran bad khung ei ia ki mobile phone ba rem dor kiba kot sha ka T. 20 lak tam.
Kane ka jingjia kala jia hapdeng ka por 3:30 baje mynstep bad 4 baje bad kane ka dukan mobile ka dei jong u Bah Rebelson Paraiat .
Kat kum ka jingong jong une u trai, ki nongtuh kila khung lut ia baroh ki mobile jong ki kompani bapher bapher kiba shongdor ia ka T.20 lak tam nalor ka jynrat bad rong ei ia ka synduk jong ka kor CCTV kaba la pyndait hapoh ka dukan.
Une u trai dukan ula pynpaw ia ka jingduh jingkyrmen ban lapdien ia kine ki nongtuh namar ula shem ba ki kor CCTV baa pyndait da ka Tnad Pulit ha Motphran ka dei ka bym treikam shuh.
“Nyngkong nga dang khmih lynti ba ki nongtuh kin ym lait satia na ki kti ka aiñ namar ki kor CCTV jong ki Pulit ha Motphran hynrei lyngngoh pat ban tip ba ki Pulit kila iathuh ba kine ki kor kim treikam shuh” ula ong.
Une u trai dukan ula pynpaw ruh ia ka jinglyngngoh ba kumno ki Nongtuh ki iohlad ban prong tuh ia ka dukan jong u watla ka Motphran ka dei ka jaka kaba ki Pulit ki pynjur bha ia ka bor pahara.
Ki Pulit ka Lumdiengjri Police Station haba ioh jingtip ia kane, kila leit ban lum ia ki sakhi satar bad ka jingtohkit mynta kala iaid shakhmat ban lapdien ia kine ki nongtuh.
