Jowai, Nohprah 06 : Ki kynhun bapher bapher ka Ri-lum Jaintia, kila ai jingmut ia ka Expert Committee on State Reservation Policy, ba kan pyntreikam da ka bhah kyllum ba 80% na ka bynta ki paid Khasi, Jaintia bad Garo.
Kane ka jingai jingmut kala mih ha ka public hearing jong ka Expert Committee kaba long hynne ka sngi Thohdieng hapoh ka Conference Hall jong ka Divisional Soil & Water Conservation Office, Jowai, ban bishar ha ka ban pynkylla thymmai ia ka State Reservation Policy.
Kane ka sur kala mih na ka kynhun Jaintia Coordination Committee for Reservation Policy (JCCRP) kaba dei ka kynhun ki Seng bapher bapher ba kynthup ia ka Synjuk Waheh Chnong Ri Jaiñtia, Jaiñtia Students Union, Jaiñtia Youth Federation bad ka Jaiñtia Students Movement.
U Chairman ka JCCRP bad President ka JSU Jersom Shylla ula pyntip ba ka Coordination Committee kala dawa ia ka bhah kyllum lang ba 80% ia baroh lai tylli ki Jaidbynriew riewlum ka Jylla, ki Khasi, Jaintia bad Garo.
Ula ong ba kane ka jingai bhah kyllum kan pynthikna ia ka jingiakhun bad ka jingjied ia ki kyrtong kiba biang eh ha ka thungkam thungjam.
