Shillong, Naitung 12 : U MLA ka Rajabala constituency Dr Mizanur Rahman Kazi, ha ka sngi Nyngkong, ula leit aiti ia ka dorkhas sha ka Expert Committee halor ka Reservation Police bad dawa ban ai jingithuh noh ia ki Muslim trai shnong ki jaka them ka Ri-lum Garo kum ki Other Backward Class (OBC) bad ban ai bhah ba 5%.
Ia kane ka dorkhas la aiti sha u Justice (Retd) MC Garg, Chairman ka Expert Committee halor ka Reservation Policy ka Jylla.
U Kazi ula kren halor ka histori bad ka jinghiar pateng jong ki Muslim kiba sah ha ki jaka them ka Ri-lum Garo lem ki tynrai jong ki naduh ka por jong ki Mughal Empire. Ula kdew ruh ia ki riewkhaw bad ki jaka sahnam kum ka lum jingtep u shipai General ki Mughal Mir Jumla hajan Ampati bad u Dargah Sharif ka Hazrat Peer Shah Kamal Baba ha Mahendraganj.
Haba iakren bad ki lad pathai khubor hadien ba aiti ia ka dorkhas, u Kazi ula ong “Nga la ai ia ki katto katne ki jingai jing mut haba iadei bad ka jingpynbeit thymmai ia ka Reservation Policy. Ka jingai bhah ka dei ka kam kaba eh bha. Nga la pyrshang ban batai ia ka histori jong ki briew ba sah ha ki jaka them ka Ri-lum Garo”.
Haba kylli ia ki jingai jingmut, u Kazi ula ong “Ki don artylli ki mat. Kawei ban ithuh noh ia ki jaidbynriew Muslim kum ki OBC haba khmih ia ka rukom im bad ka ioh ka kot jong ki. Kaba ar, nga la kyrpad ban ai bha ba 5 % ia ki”.
Haba kren ia ka jingsam bhah hapdeng ki Khasi-Jaintia bad Garo, u Kazi ula ong “Kaei ka bhah kaba ki hynmen ki para Khasi, Jaintia bad Garo ki ioh, nga khlem ktah ia kane. Ka jingkyrpad jong nga ka long ban ai 5% na ka General quota” ula ong.
 MC Garg, Chairman ka Expert Committee halor ka Reservation Policy ka Jylla.){kind=link}