Shillong, Jylliew 20 : U Chief Secretary ka Jylla Bah DP Wahlang un sa aiti ia ki jingai jingmut ia ki sienjam ban sa shim da ka Sorkar Jylla haba iadei bad ka kaiphod jong ka Expert Committee on the State Reservation Policy, hapoh ka 31 tarik Nailar.
“Ka kynhun Myntri kala bynshet ia ka kam ban pule bniah ia ka kaiphod ha nga bad ngan sa aiti ia ka kaiphod hapoh ka 31 tarik Nailar” ong u Bah Wahlang haba iakren bad ki nongthoh khubor ha ka sngi Thohdieng.
“(Hadien ba dep pule bniah ia ka kaiphod jong ka Exepert Committee), ngan sa ai ia ki jingai jingmut ba pura bad ia ki sienjam ki ban sa shim hapoh ka 31 tarik Nailar” ula bynrap.
Ha ka 13 tarik Jylliew, ka jingialang jong ka Kynhun Myntri kala bynshet ha u Chief Secretary ban pule bniah ia ka kaiphod bala aiti da ka Expert Committee-kaba bishar bniah ban pynkylla thymmai ia ka Job Reservation Policy ka Jylla.
Ka Expert Committee kaba khlieh da u Justice (Retired) Mool Chand Garg, ka dei kaba la thung da ka Sorkar Jylla ha ka 12 tarik Nailur 2023, ban bishar thymmai ia ka Reservation Policy ha Jylla hadien ka jingdawa pynkylla na kiba bun balang.
