Shillong, Jylliew 26 : U Myntri Rangbah ka Jylla Conrad K Sangma hynne ka sngi Nyngkong, ula pyntip ba ula dep bthah ia ki Committee bala thaw ban shong bishar ia ka State Reservation Policy ba kin bishar lang ia ka jingdawa jong kiwei ki riewlum ritpaid ka Jylla ban ai ia ka bhah ba 15% sha ki ha ka Job Reservation Policy.
Kane ka jingbthah ka long ia ka Committee ki seng sain pyrthei bad ka Expert Committee ki ban shong bishar biang ia ka State Reservation Policy ka Jylla kat kum ki jingdawa jong ki kynhun bapher bapher lem bad seng sain pyrthei.
Haba pyntip ia kane, u Conrad ula ong ba ki riewlum ritpaid bapher bapher ka Jylla kila wan aiti da ka dorkhas sha u ba dawa ban ai bynta lem iakine ki jaidbynriew ha ka bhah thungkam ka Jylla.
“Halor kane, nga la pyntip sha phi ba ia kine ki dorkhas yn sap hah sha ka Committee jong baroh ki seng sain prythei bad ruh sha ka Expert Committee. Ai ba kine ki Committee kin shong bishar (ia ka jingdawa) bad kin sa ai jingtip sha ngi” ula bynrap.
Ha ka 22 tarik Jylliew, ka Meghalaya Indigenous Minority Tribes’ Forum (MIMTF) kala dawa haduh 15% ia ka bhah thungkam na ka bynta ki jaidbynriew Rabha, Boro, Hajong, Koch bad ki Mann jong ka Ri-lum Garo.
Ha ka dorkhas, ka Forum kala ong “Ngi da kyrpad rit ba phin mynjur lem ha ka ban ai 15% ka bhah, haba phi shong bishar bad pynkylla thymmai ia ka State Reservation Policy ia ki riewlum rit paid ka Jylla khamtam ia ki Hajongs, Koches, Rabhas, Boro-Kacharies bad ki Mann bad ban ailad lem ia ki ba kin kiew bad iaryngkat kyrdan lem bad ki Khasi, Jaintia bad Garo”.
“Lada mynjur, ngi sngew, kane kan khyllie pat ia ka jingduhnong ba ngi la mad ha kine ki 51 snem bala leit noh haba phai sha ka jingshakri lyngba ki kam Sorkar bad haba phai ruh sha ka pule dangle, ka kamai kajih bad kiwei kiwei” kila ong.
Haba pynpaw ba ki dei ki Nongshongshnong ba pura ka Jylla Meghalaya, ka Forum kala ong ba kum ki Khasi, Jaintia bad ki Garo, ki ruh ki dei ki “paid riewlum trai ri” haba bynrap ba ki Karb/Marngar (Dimasa) ba sah ha Ri-Bhoi District ruh ki dei ki paid riewlum trai ri jong ka Jylla.
“Ha kane ka Job Reservation Policy ba mynta, kaba long 40 % ia ki Khasi bad Jaintia, 40% ia ki Garo, 15 ia ki General bad 5% ia ki OT bad Schedule Caste, watla ka bhah jong ngi ka long 5% hynrei ka jingshisha pat ka long tang 2% lada ym duna namar ngi hap ban iasam lang bad ki Scheduled Caste bad kiwei kiwei ki riewlum na shabar ka Jylla kum ki Naga, Mizo bad kiwei kiwei” kala ong.
Ia kane ka dorkhas la soi da ka Meghalaya Hajong Welfare Association, Meghalaya Rabha Jatio Sewa Sangha (MRJSS), Meghalaya Koch Association, Meghalaya Boro Sahitya Sabha bad ka All Mann Tai Speaking Welfare Association.
