Shillong, Jylliew 17 : Ka Thma u Rangli Juki (TUR) kala tyrwa ban pyntreikam da ka “Deprivation Point System” ha ka Reservation Policy ka ban long ym tang na ka bynta ki kynhun Jaidbynriew ba dang sahdien hynrei kan long ruh ia kito ki briew kiba sahdien.
Haba ai ia ki jingai jingmut sha ka Expert Committee on Reservation Policy hynne ka sngi Nyngkong, ka TUR kala ong “ Ka Deprivation Point ka dei ka lynti ban ai lad ia ki nongshong shnong kiba dang kham sahdien ban ȉoh kham bun ka bhah ha ka mang kyrpang jong ka thungkam”.
“Kane ka Deprivation Point kam dei ban long tang na ka bynta ki kynhun Jaitbynriew kiba sahdien, hynrei ka dei ruh ban long na ka bynta kito kiba sahdien ha ka ȉoh ka kot bad kiba wan na ka thaiǹ ha Meghalaya kaba dang duna ha ka roi ka par” kala bynrap.
Kat kum ka jingong ka TUR, ka jingtreikam jong ka Reservation Policy ha Meghalaya haduh mynta ka long kaba lah shilliang bad ka pynȉohnong tang ia kito ki Trai Ri Trai Muluk, la ki dei ki Khasi ne Garo, tangba kiba im,
kiba shong ba sah ha ki District kiba la kiew shaphrang bad kiba wan na ki longȉing kiba riewspah kiba lah ban buh skul ia ki khun ha ki skul kiba rem, kiba bha la ka long hapoh bad shabar jong ka Jylla.
“Kane ka Deprivation Point ba tyrwa ban pynrung ha ka Reservation policy ka dei ban pynshong nongrim halor ka ȉoh ka kot jong ka ȉing, ka jinglong jingman ka thaiǹ ba u ne ka samla wadkam ki wan bad ka pule puthi ba ki ȉoh lane ka skul ne kolej ba ki leit bad ia kine ki Deprivation Point dei ban khmih bniah man la ka san snem katkum ka jingroi bad jingkiew jong ki District” kala ong.
Ka TUR kala ai nuksa “ U ne ka khynnah kiba dei kiba nyngkong eh kiba shong skul na ka longȉing bad kiba kha bad heh bad san ha ka District kaba dang sahdien bad kiba pule ha ki skul shnong bad ki Kolej ki bym da biang, kine ki dei ban ȉohtam lypa ki mark ne ki point ban ia kiwei ki samla wadkam kiba dei na kajuh hi ka Jaitbynriew, tangba kiba dei ki khun jong ki Grade A ophisar jong ka Sorkar bad kiba ȉohlad ban pule ha ki skul kiba bha tam ha Nongbah Shillong. Ha kane ka rukom lah ban kyntiew ia ka lad jong ki samla wadkam kiba duk bad kiba sahdien ban ȉoh ia ki kam Sorkar bad ha kane ka dur lah ruh ban kyntiew ia ka ȉoh ka kot jong ka longȉing bad ka thaiǹ ba ki wan”.
Ka Tura kala ong ba ha kane ka juk stad kaba lah ban buh jingkheiǹ ia ka jingdon ki samla bad ki briew kiba treikam Sorkar, kam don jingeh ei ei ruh em ban pyntreikam ia kane ka Deprivation Point.
“Kane ka jingdawa ban pynkylla ia ka Reservation Policy ka la plied ia ka synduk kynsha jong ka Pandora kaba shlei da ki jyrwit jyrwat bad ki sohkyrdot. Mynta mano ban law ia kine ki sohkyrdot? Kawei ka kynhun ka peit sha kane ka jingdawa kum ka jingȉaleh ba kawei ka jaitbynriew ka dei ban ȉohnong bad ba kawei pat kan duh” kala pynpaw.
“Ki don pat ki bym kwah ban pynkhih ia ka bad ki kwah ba ka Reservation Policy kan neh kumba ka long namar ba kim kwah ban pynthut iano iano ruh lymne ban wanrah ia ka jingȉapeit matdong hapdeng ki jaitbynriew” .
Ka TUR ka ngeit ba ha ka synshar paidbah ki policy, khamtam eh kum ka Reservation Policy, kiba ktah lane kiba dei ban wanrah jingmyntoi ia ki paidbah ym dei ban pynlong ia ka kum ka jingȉakhun ha kaba kawei ka kynhun kan ȉohnong bad ba kawei pat kan duhnong lymne ba kan long na ka bynta ka burom ka Jaitbynriew.
“Ka Reservation Policy ka dei ruh ka Affirmative Action, kaba mut ba ki kynhun ne ki nongshong shnong kiba dang sahdien, kiba duk lane kiba shah ban beiǹ ne kiba shah kheiǹ poh ki dei ban ȉoh ka lad ban kiew shaphrang da thaw ia ki policy kyrpang na ka bynta jong ki” ong k TUR.
“Namarkata, ka Affirmative Action ne Policy Kyrpang kum ka Reservation Policy kaba la ithuh da ka Riti Synshar kam dei ne kam shong katno ka jingdon jong ki briew ne nongshong shnong, hynrei ka dei ka atiar ban pynpra ia ki kynroh jong ka jinglah shilliang bad jingsynshar donbor kaba junom jong ki kynhun kiba la
roi, kiba riewspah bad kiba la kiew shaphrang” kala bynrap.
Ka TUR kala ong ruh “Ka Affirmative Action ka mih ruh na ka jingangnud ban wanrah ia ka imlang sahlang ha kaba baroh ki nongshong shnong ki ȉaryngkat dor. Kita ki kynhun kiba la roi, kiba la riewspah bad kiew shaphrang ki wit bad ki thut ia ka jingthmu ba nylla jong ka Affirmative Action namar ba ka ktah ia ka bor, ka burom bad iktiar jong ki. Kita kiba donbor bad kiba bun paid ki shim ba ka imlang ka sahlang ka dei ka jaka jong kiba donbor”.
Ka TUR ka ngeit ba ha ka synshar paidbah ki nongsynshar ne bor synshar ki dei ban pynȉaid ia ka synshar khadar na ka bynta ban kyntiew ia kiba duk, kiba tlot bor bad kiba sahdien. Kumta ka jingai jingmut jong ka TUR kam dei ban pynkylla ia ka bhah thungkam kaba long 40-40% ia ki Khasi-Jaintia bad Garo bad 5% ia kiwei ki ST, hynrei ka Review ia ka Reservation Policy ka long ban peit bniah ia ki jingmih ne jingsei soh na ka jingpyntreikam ia ka Reservation Policy ha ka Jylla ha kine ki 50 snem.
“ Ka TUR ka sngew ruh ba lymda ngi phai dien sha ka History haba la thaw ia ka Reservation Policy ha ka Jylla ha ka snem 1972, ngin ym lah ban tip bad shemphang ia ki jingkam ne jingong jong ki kynhun na baroh ki liang. Kumta ka TUR ka ngeit ba ki jingai jingmut kiba shongnia bad kiba shong aiǹ ki dei kiba lah ban pynshisha da ki sakhi kiba shai, ki jingkheiǹ kiba thikna bad kiba lah ban ȉeng ynda haba la tynjuh ia ki ha khmat ka Aiǹ bad ka Riti Synshar” kala ong.
Kumta ki jingai jingmut jong ka TUR kim dei ka jingdawa ban pynkylla lymne ban pynneh ia ka Reservation Policy, hynrei kaba kongsan ka long ban peit bad thwet bniah ba kumno la pyntreikam ia ka Reservation Policy bad ban shem ia ki sakhi ne ki dak jingkheiǹ kiba shai kiba ngi lah ban pyndonkam ha ka por ba Review ia ka Reservation Policy.
Nalor nangta ban ngam jylliew bad ban shem ia ki buit thymmai ban nang pynkhlaiǹ bad pynbha ia ka Reservation Policy kaba long ka atiar kaba kyntiew ia ngi ki rit paid khnang ban lah ruh ban wanrah ia ka jingȉaryngkat dor hapdeng ki jaitbynriew ha ka Jylla.
Ka TUR ka angnud ban wanrah ia ka jingǹiewkor bad jingburom kylliang hapdeng ki jaitbynriew bad nongshong shnong bapher ha ka Jylla bad ba ka roi ka par kan long na ka bynta baroh. Ha kajuh ka por ban pynkhlaiǹ pynbha ia ki policy kiba ȉada ia ki Trai Ri kiba long ruh ki ritpaid hakhmat ka Ri India ba ȉar.
