Shillong, Risaw 18: U Chairman ka Regional Committee ka West Khasi Hills bah Renikton Lyngdoh Tongkhar ula iathuh ba ki don katto katne tylli ki shnong kiba khlem shah kynthup haka jingiakren pynbeit pud hynei kila pynpaw ba ki kwah ban don ha Meghalaya.
Haba kren sha ki lad pathai khubor u bah Renikton ula ong ba haka jingialang ba nyngkong jong ka Regional Committee ka West Khasi Hills kine ki shnong kiba khlem shah kynthup haka jingiakren pynbeit pud bad ka jylla Assam kila wan ban pynsngew halor ka jingkwah wan noh sha Meghalaya bad naka liang ka komiti ruh kala iakren halor kane.
“Ka komiti kala sngap iaki jingpynsngew jong baroh ki wan shim bynta haka jingialang naduh ki Syiem, ki Rangbah Shnong, ki trai jaka bad kumjuh ruh ki sengbhalang bapher bapher jong ka thain West Khasi Hills” ula pyntip haba bynrap “Kila don ki katto katne ki shnong kiba khlem wan haka jingialang”.
U bah Renikton ula ong ba naka liang ka komiti kan sa bishar bniah halor ka jingpynsngew ki katto katne ki shnong bad lada kine ki shnong ki hap haka Map jong u snem 2011 bad lada ka don ka jingkylla ki shnong lane ka jingmih shnong thymmai hadien 2011 naka liang ka komiti ruh kan sa leh iaka ba donkam.
Ula iathuh ba watla um kynmaw iaki shnong ba khlem hap haka Map 2011 hynrei ki don haduh 3 ne 4 tylli ki shnong kiba khlem shah kynthup ha kane ka jingiakren pynbeit pud bad ka jylla Assam.
“Kila don haduh 53 tylli ki shnong kiba shah kynthup ha kane ka jingiakren pynbeit pud bad ka jylla Assam bad ki don katto katne tylli ki shnong kiba dei ki shnong Nepali kiba pep ban wan shaka jingialang jong ka Regional Committee” la ong u bah Renikton.
