Shillong, Risaw 18 : Ka Iingkashari Meghalaya High Court hynne ka sngi ba-ar, kala bthah ia ka Sorkar Jylla ban wanrah noh ia ki buit ne plan ba bniah kumno ban pynjanai ia ki jaka ai jingsumar ha ka Jylla hashuwa ki pdiang taiew jong u Naiwieng mynta u snem.
“La kyrmen ba hapoh ki pdeng taiew jong u Naiwieng, 2022, ngi dei ban ioh ia ka plan ba bniah, kynthup kumno ban ai jingsumar ia ki nongpang ba pang jur bad ki nongpang ba don ia ki jingpang ba jur wat ha ka por ba lyngkot” ong ka Division Bench ha ka hukum bala pynmih hadien ka jingshong bishar ia ka suo-moto PIL halor kane ka kam.
Ka Iingkashari ka ong ruh ba ka lah ban pdiang ia ki jingujor bad ka lah ruh ban hap pyntip ia kine ki kam sha ki Executive, hynrei haba phai sha ki lad ai jingsumar, ka Iingkashari kam don satia ia ka jingshemphang ban pynmih ia kano kano ka hukum, khamtam ha ka Jylla kaba ju aidaw ia ka jingduna pisa ba kan pynbiang ia ki jaka ai jingsumar ha ka Jylla.
Ka hukum ka ong ba watla ka Sorkar Jylla kala ong ba ka don jingthmu ban iasoi ia ka MoU bad ka Jylla Tamil Nadu ba kan phah ia ki doktor ba kin ai jinghikai pyntbit ia ki doktor hapoh ka Jylla hynrei kam shym la don ka jingpynpaw da ka Sorkar haba iadei bad ki sienjam ba dei ban shimnoh mardor ha kaban pynjanai ia ki lad ai jingsumar ne ban ai ka jingiarap ia kito kiba shitom hapoh ka Jylla.
Ka Iingkashari kala buh ban bishar biang ia kane ka mukotduma ha ka 16 tarik u Naiwieng.
