Shillong, Lber 30: Ka Nongbah ka jylla Meghalaya, Shillong ka dei ka hill station kaba itynnad bad ba pawnam bha-kaba khring bha ia ki briew ba nabar ba kin wan , hynrei kane ka nongbah ka dang don pat hapdeng ka jingïakhun ïa ka jingeh kaba mih na ka jingnang bun ki jaboh jabaiñ. Ka jaka lum niut ka Marten kala dap lut bad ki bor kiba dei khmih ki dang wad ia ki jaka ban ioh ban shna ia ka jaka lum niut.
Ka Nongbah Shillong ka pynmih haduh kumba 171 Metric Ton ki jaboh man la ka sngi ha ka Greater Shillong Planning Area, ha kaba uwei pa uwei u briew u pynmih 378 gram ka ki niut ki nier ha ka shi sngi. Ka jingpynmih ia u niut ka long kumba 5,130 Metric Ton ha ka shi bnai bad 62,415 Metric Ton ha ka shi snem. La khmih bniah man la ka sngi ia ka Marten ha kaba iadei bad ka jinglong jingman jong ka lyer, ka um kaba don shapoh khyndew bad ka um jaboh kaba mih na kane ka jaka lum niut. Ka sorkar ka dang trei shitom ban wad ia ki jaka ban shna ia ka jaka lum niut kaba thymmai hynrei kane ka kam ka dang shim por. Hapdeng jong kane ka jingeh, uwei u nongseng kam seng lajong u ialam nakhmat ban iakhun pyrshah ia ka jingeh kaba ka Shillong ka mad na ka jingmih jong ki jaboh jabain.
Iakynduh ia u Rony Saha, u Nongseng ka Recycle Bazzar
U Rony Saha, u nongseng jong ka Recycle Bazzar, ka kompani kaba nyngkong eh ha Meghalaya ban sdang ia ka jing pyndonkam bad pynmih ia ki mar na ki niut ki nier bad ki jaboh jabain, kadei kaba ula ioh mynsiem naduh ka por ba u dang khynnah kaba ula iakhun pyrshah ia ki jaboh jabain kiba la sahkut ha ki nala hajan ka iing ka jongu ha Keating Road. Ula don ia ka jingiohi jngai ban ban wad ia ki lad ki lynti ban pynbeit ia kane ka jingeh, ym tang ban pynkhid ia ka sor Shillong hynrei ban thaw ruh ia ka lad ban iohkam iohjam.
Ka jingsdang kaba rit da ka jingiohi jngai kaba khraw
Ka Recycle Bazzar, kadei kaba la sdang ha u Nailur 2024, kaba ka rukom treikam ka long kaba suk bha hynrei kaba don pat ia ka jingmut kaba khraw – “Pynkylla ia ki nuit sha ka spah”. Lyngba katei ka kompani la sdang ban pyndonkam biang ia ki jaboh jabain ha ka lynti kaba long ryntih da kaba pynïasoh ïa ki longïing bad ki nonglum ia ki tiar jot bad ki karkhana kiba pyndonkam biang ia ki jaboh jabain lyngba ka App kaba lah ban pyndonkam ha ka lynti kaba suk bha.
U Rony ula ong ba ula kynmaw kumno ka Kmie ka jongu kala pynmih ïa katei ka rukom pyrkhat pyrdain, “Ha ka por ba saphriang ka khlam COVID-19, ki nuit ki nier bad ki jaboh jabain kila lang shibun bha bad ka kmie jong nga kala ong, ‘Hato kan ym long kaba bha bad kaba khraw, lada don kiba lah ban lum bad pyndonkam biang ïa kine ki jaboh jabain kaban long ruh ka lad ban ïarap ïa kiwei pat ki briew ban kamai jakpoh?’ Dei hangne ba nga la rai ba ngan dei ma Nga?.
Da kaba iehnoh ia ka kam kaba u trei bad ka kompani ha Mumbai, u Rony ula wanphai noh sha Shillong bad ula trei bad la u Kni uba pyniaid ia ka jaka lum ia ki tiar jot. Ula pule bniah shaphang ka jinglong jingman jong kane ka kam naduh tynrai bad ula sngewthuh bha ruh shaphang ka jingpyniakhlad ia ki jaboh bapher bapher, ki rukom pyndonkam biang ia ki jaboh bad ka jingdon ia ka iew ka hat. Lyngba ka pynkup bor da kane ka jingnang jingstad, kumta ula shim ia ka sienjam ban pynmih ia ka Recycle Bazzar.
Na ki 100 tylli ki kot lyngkdop sha ka jingialeh ha baroh kawei ka Sor
Ka Recycle Bazzar kala sdang da kaba sam ia ka jingpyntip ha Laitumkhrah bad Police Bazar. U Rony ula dap da ka jingkyndit haba kane kala kylla long ruh kum ka Campaign kaba la saphriang sted lyngba ka WhatsApp, ha kaba ula ioh 120 tylli ki jingdawa ia ka kam, ha ki lai bnai kiba nyngkong. Kane ka jingioh ia ka jingdawa ia ka jingshakri kala pyni ba ka nongbah Shillong bad ka Thain Shatei Lammihngi ki donkam ia ka jingshakri kaba janai bad kaba ryntih ha kaban lum bad ban pyndonkam biang ia ki jaboh jabain.
Mynta ka Recycle Bazzar kala nang roi bha da ka jingdon ia ka kynhun kaba aiti ialade kaba kynthup ia u :-
Sunny Saha (COO)
Rupesh Bhaskar (CTO)
Sahil Kumar Saha (CFO)
Jugal Kishore Das (Senior Android Developer)
Iba Suting (Operations Manager)
Anuranan Chetia (Senior iOS Developer)
Alvareen Mary Shangpliang (Operations Head, Meghalaya)
Anowar Hussain (Head of Titans)
The Titans: Shillong’s Waste Warriors
Ka Recycle Bazzar ka don ia ka kynhun kaba aiti lut ha ka jingtreikam, kaba la tip kum ka Titans. Kine ki riewshimet ki don ka bynta kaba khraw ha kaban pyntreikam ia ka buit pyniaid jaboh jongka kompani. Ki Titans ki don ia ka jingkitkhlieh ban lum, pyniakhlad ia ki jaboh jabain bad pyntreikam ne pyndonakm biang ia ki jaboh. Bun na kitei ki Titans kidei kiba wan na ki longïing kiba duna ha ka ioh ka kot bad ka Recycle Bazzar kala ai kam ai jam ïa ki ryngkat bad ia ka buit ka sap bad ban ioh ia ka tulop kaba thikna. Da kaba pynkupbor ia kine ki Titans, kane ka karkhana kala pynthikna ba ka jingpyndonkam ïa ki jaboh jabaiñ kam dei eh tang ka jingshakri hynrei ka long ruh kum ka lad kamai kaba neh na ka bynta kiba bun hapoh ka nongbah Shillong.
Kumno ka Recycle Bazzar ka Treikam
Kane ka karkhana ne Startup ka treikam ha ki 4 tylli ki bynta: ka Solid Waste Management – jingai jingnang jingstad, ka jingpyniaid ryntih ia ka rukom lum ia ki jaboh bad ka jingtreikam ban ioh pyndonkam biang ia ki.
Ka Jinglum ia ki jain kiba la rim – Ka jingpynshlur ban pyndonkam biang ia ki
Ka jingpyndonkam biang ia ki kali – Ka jingpynjanai bad pyndonkam biang ia ki kali bad ki tiar kiba la rim.
Ka jinglum jaboh na man la ki iing – Ka jingai jingshakri ha kaban lum jaboh na ki iing ki sem, ka jingpyniakhlad ia ki jaboh bad ka jingai jingshakri ban leit pynbret ia kitei ki jaboh jabain.
Da kaba pyndonkam ia katei ka App jong ki, ki paidbah ki lah ban buh ia ka por ban wan lum ia u nuit jongki. Ia utei u niut ba la lum la thew bad ki paidbah ki ioh ia ka Credit ha ka pla tyngka ka jongki ha ka Recycle Bazzar, ia kaba ki lah ban pynkylla noh ia katei ka Credit kum ka pisa kaba ki lah ban sei. Kane ka karkhana ka ïatreilang ruh bad 5 tylli ki jaka lum ia ki jaboh jabain kiba don ha kylleng ka nongbah Shillong, ban pynthikna ban ioh pyndonkam bun ha kaban ioh pyndonkam biang ia kitei ki jaboh jabain ha ka rukom kaba paka.
Ki jingtynjuh bad ka lynti iaid ba shakhmat
Wat hapdeng ka jingmad ia ka jingjop, hynrei ka Recycle Bazzar kala ïakynduh ïa ki jingeh bad kawei na ka jingeh kaba kongsan bha kadei ki jaboh Plastic ne ki Multi Layered Plastic (MLP)—kum ki paket plastik chip bad biskit—kiba eh ban pyndonkam biang. “Ngi dang trei ïa ki buit thymmai da kaba pyndonkam ia ki kor ki bor ban ioh ban pyndonkam biang ïa ki plastik MLP,” ong u Rony.
Sa kawei pat ka jingeh ka long ban pynkohnguh ia ki nongdie tiar jot ban pdiang ia ka rukom pyndonkam biang kaba kham janai. Kiba bun hi ki lum tang ia ki tiar jot kaba ki lah ban iohnong bha, hynrei kila kyntait pat ban thied ia ki tiar jot ne ki jaboh jabain kaba ka jingiohnong ka long kaba duna bha. Hynrei ka Recycle Bazzar ka iengskhem ha kaban iaid ha kata ka rukom kaba paka ha ka rukom ban pyndonkam biang ia ki nuit bad ia ki jaboh jabain da kaba pdiang lut ia baroh ki jaboh jabain naduh ki plastik, ki nar, ki jain rim bad kiwei kiwei.
Ka jingkyrshan ka Sorkar bad ka jingpynheh ia ka kam
Kane ka karkhana dang shen kala ioh pdiang T.2 Lak kum ka jingbei tyngka jong ka Meghalaya’s E-Championship Challenge, ka sienjam kaba la shim da ka sorkar jylla ban kyrshan ia ki nongsneg kam lajong.
U Rony ula pynpaw ia ka jingsngewnguh ia kane ka jingai jingkyrshan bad ula ong, “Ka jingbtin lynti bad ka jingai jinghikai bad ka jingkyrshan da ka pisa na ka sorkar, kala long kaba kongsan bha ia ngi ban pyniar ia ka kam”.
Haba peit ia ka jingiaid lynti nangne shakhmat, ka Recycle Bazzar ka don ia ka jingthmu ban pyniar ia ka jingtreikam sha Jowai bad Mairang hashwa ba kan leit rung ha kiwei pat ki bynta jong ka thain shatei lammihngi. Ka jingthmu kaba jngai? Ka jingpyniar ha kylleng ka ri India, ban thaw ia ka lad ban ai kam ia shi lak ngut ki briew bad ban pynkylla ia ka rukom pyniaid ryntih ia ki jaboh jabain ha baroh kawei ka ri India.
Ka lawei kaba khuid bad ba jyrngam
Ka thong jong u Rony ka long kaba shai kdar. “Ngim kwah ban mih bujli iano iano, ngi kwah ban iatreilang bad ka iew ka hat kaba la don lypa bad ban kynthup lang shuh shuh ia ki nongkhaii ia ki mar jot lyngba ka kor teknoloji bad lyngba ki buit treikam kiba paka”.
Ka Recycle Bazzar ka don ia ka thong ban pynlong ia ka sor Shillong baroh kawei bad ia ka ri India, kum ka nuksa kaba tbit ha ka rukom lum bad rukom pyndonkam biang ia ki niut bad ia ki jaboh jabain.
“Haba ki briew ki wankai sha ka ri jong ngi, Nga kwah ia ki ba kin ong, ‘Sare Jahan se Achha Hindustan Hamara’ (Ka ri India kadei kaba bha tam ha ka pyrthei).
Ka Recycle Bazzar kam dei tang kaba pyrkhat ia ka jingkamai pisa, hynrei ka long ruh kum ka jingiakhih ban pynkhuid, ban kamai bad pyndonkam biang na ka bynta ka jingbha jong ka lashai.
