Ranji Tropy | Khlem lah pynlong ia ka jingiakhun ba shong sngem ka madan ialehkai

Shillong, Risaw 15: Wat lada ka suin bneng khamtam lei lei ha ka por mynstep, ka la shai kdar kdar, pynban ka jingwan ban ther u slap ha kine ki khyndiat taiew kiba la dep, ka la pynlong ia ki bor pyniaid ka BCCI ba kim shim la lah satia ban ioh ban sdang ia ka sngi ba nyngkong ka jingiakhun jong ka lympung ka Ranji Trophy, kaba la dei ban ialehkai hapdeng ka Meghalaya pyrshah ia ka Mizoram, ha madan ialehkai kriket ka MCA kaba don ha JN Stadium, Polo.

Ha ka jingshisha, kat kum ba la buh ia ka por, ia kane ka jingiakhun, la dei ban sdang ia ka naduh ka por 8:30 mynne ka sngi, pynban na ka daw u slap uba jur ha kine ki khyndiat sngi, ka la don ka bynta  ka madan kaba marjan bad ka JN Stadium, ka jhieh bad sngem, kaba la pynlong ia ki nongtrei, ba kin pyrshang ban pynrkhiang ia ka, ia kaba kam shim la lah ban urlong satia.

Kane ka la pynlong ia ki bor ba dei khmih ba ha  kaba nyngkong kin pynjlan shwa ia ka por sdang ia kane ka jingiakhun, da kaba iai bteng ban khmih bad jurip ia ka jinglong ka jingman jong ka madan bad dei tad haduh ka por 2 baje nohphai sngi, ba ha ka jinghiar jurip kaba bniah, ba la lap ba kane ka bynta ka madan  kam pat rkhiang bha da kumta, la rai ruh ban pynsangeh noh shi syndon ia ka sngi ba nyngkong jong kane ka jingiakhun.

Wat la katta ruh, ha shwa ban shimti ki bor ka BCCI naka bynta ban pyniaid shakhmat ia kane ka jingiakhun, ka  Meghalaya Cricket Association (MCA) ka la pdiang ia ka jingsdang ban wan ka samoi ialehkai  kriket ka Ranji Trophy, da ka jingialang kaba la wan ban ia don lang  da u  President bad Secretary u Naba Bhatacharjee bad Raynold Kharkami bad  kiwei pat ki dkhot ka MCA, ban pdiang sngewbha ia u Match Referee Amit Pathak, ki arngut ki Umpire Vinod Ingle Dharmesh Bhardwaj ,u Sr Video analyst Utpal Das bad kumjuh ia u BCCI Neutral Curator u B Talukdar, ha ka juh ka por ban pdiang sngewbha lang ruh ia ki dkhot ka kynhun ialehkai jong ka Mizoram.