Shillong, Rymphang 20: Ka Hyderabad kala pynrem ia ka Meghalaya da 5 Wiket ban rah ia ka nam lahduh jong ka Ranji Trophy Plate Group kaba la long ha Rajiv Gandhi International Cricket Stadium ha Hyderabad hynne ka sngi Baar.
Ka Hyderabad kala bteng ban tied biang da kaba donkam ban kamai sa tang 127 run bad ka Hyderabad kala jop da kaba hap tang 4 wiket.
Ki nongkawang bol ka Meghalaya kila ialehkai bha hynrei kim shim la lah ban tehlakam ia u nongialehkai ba pawnam ha ka Indian Premier League u Tilak Varma uba la kamai 64 run na ki 50 bol ban pynthikna syndon ba ka Hyderabad kan ioh khur ia ka nam lahduh.
U Varma ula shah pynhap noh ha u Raj Biswa katba u Chengkam Sangma ula ioh 3 wiket bad u Aryan Borah ula ioh 1 wiket.
“Ka MCA ka sngewsarong ia ka kynhun jong ngi kaba ialeh ia ka Ranji Trophy kaba long kaba seisoh mynta ka samoi,” ong u Secretary jong ka Meghalaya Cricket Association u Bah Gideon Kharkongor.
Ula ong, kane kadei ka jingialehkai kaba ka kynhun jong ngi naduh u snem 2018 kaba ngi la ioh jingithuh na ka BCCI.
Ka kynhun kala mad ia ki jingeh kala jop 3 sien ha ka round robin bad 2 sien kala mad ia ka jingrem bad jop ha ka semifinal. Kane baroh kala jia hadien ba ka MCA kala shim ia ka rai ban pynialehkai tang ia ki nongialehkai kiba napoh ka jylla Meghalaya bad ym ban pynmih ia ki Guest Player bad kane kadei ha ka sien kaba nyngkong eh.
Da kaba poi sha ka phainal mynta ka Hyderabad bad ka Meghalaya kila ioh rung sha ka Elite Groups jongka Ranji Trophy ha ka samoi ban.
Na ka liang u President bad u Secretary jongka Hyderabad Cricket Association bad ki dkhot jongka North East Cricket Development Committee (NECDC) kila ai khublei ia ka kynhun ialehkai jong ka Meghalaya.
