Shillong, Risaw 16: : Ka lymnpung ialehkai Ranji Trophy 2025-26 plate group, kaba dei ban iakhun hapdeng ka Meghalaya pyrshah ia ka Mizoram, ha madan ialehkai cricket ka MCA ha JN Stadium, Polo, kam shim la lah satia ba kan iaid shakhmat ha ka sngi kaba ar ka jong ka, hadien ba ka jinglong jingman ka madan kam shah ne ailad ia kane ka jingiakhun ba kan lah ban jam shakhmat.
U slap uba jur ha ki khyndiat sngi shwa ban sdang kane ka jingiakhun, ka la pynlong ia ka madan ba kan sngem, khamtam lei lei ka bynta kaba don marjan bad ka JN Stadium, Polo.
Na ka liang ki nongpeit bad ki nongshna madan, ki la pyrshang lut ka buit ka bor ban pynrkhiang ia, hynrei ka jingiakhun ka jong ki ka long kaba eh bha namar ka jingsngem palat ka madan na ka daw jong ka jingjur palat u slap ha ki taiew kiba la dep, ka la sdang ruh wat ba kan pynjem ia ka khyndew , kaba buh jingman lada pat ia ki player.
