Shillong, Jan 23: U Tapas Kumar Das ula ioh khur 6 wiket bad ka Odisha kala pynhap lut ia ki nongtied ka Meghalaya da kaba kamai 198 run haka sngi nyngkong jong ka jingialehaki ia ka Ranji Trophy 2024-25 Elite Group A ha MCA Ground, Shillong hynne ka sngi Palei.
Ka Odisha kala jied ban kawang bol nyngkong hynrei haba leit ban tied hadien kala kamai 70 run khlem hap wiket bad ka donkam ban kamai sa 128 run ban khur ia ka jingjop.
Ki nongialehkai ka Meghalaya kim shym la lah ban ialehaki bha, u Bamanbha Shangpliang ula kamai 14 run, u Nishanta Chakraborty ula kamai 27 run, katba u Ajay Duhan ula kamai 15 run bad u Anirudh B ula kamai 12 run.
Ka Meghalaya kala kamai 76 run bad hap 5 wiket, ha katei ka pork ala don ka jingialehkai bha na ka liang u Sumit Kumar uba la kamai 40 run bad u Jaskirat Singh Sachdeva uba la kamai 43 run. U Wanlambok Nongkhlaw uba long u nongialehkai uba lapawbha haka jylla ula wanphai biang ban ialehkai hadien 3 snem bad ula ioh ban kamai 15 run hynrei ula shah pynkhyllem noh ha u Tapas uba la ioh khur syndon 6 wiket bad ai 76 run.
Haba ka Odisha kala leit ban tied, u Swastik Samal ula kamai 44 run bad u Shantanu Mishra ula kamai 23 run bad kine baroh arngut kim pat out satia bad kin bteng ban tied biang ha ka sngi kaba bud.
