Shillong, K’Lyngkot 23: Ka North Eastern Hill University Non-Teaching Staff Association (NEHUNSA) hynne ka sngiPalei, ka la phah tuklar lem ha u Myntri ka tnat pule puthi ka Sorkar Pdeng Dharmendra Pradhan, ban nang pyniar ia ka bor treikam jong u vice-chancellor (in-charge) ka skulbah.
“Ngi la kyrpad ïa u Myntri ka Sorkar Pdeng ban nang pyniar ia ka bor treikam sha u Vice-Chancellor (in-charge) ban thungkam noh ha ki kam bala pynbna laitkam na ka bynta ki Non-Teaching Staff. Haba buh hakhmat ia ka jingslem ban pynbeit ia ka kynrum kynram kaba don ha skulbah, ka NEHUNSA kala ong ba kan sngew burom eh lada ia kane ka jingkyrpad la lah ban pynurlong” ong u president ka NEHUNTA u Dr WR Synrem.
U Dr Synrem u la ong ba ka Association ka kyntu ruh ia u Myntri ka Sorkar Pdeng ba un tuklar noh kham kloi ban pynbeit ia ki kynrum kynram ba dang iaid mynta hapoh ka skulbah.
“Namar ba u Vice-Chancellor (VC) u la shim shuti namar ka jinglong jingman kaba don mynta, u Professor uba rangbah tam ula peit ia ka Ophis jong u Vice-Chancellor, katkum ka NEHU Acts bad Statutes” u la ong.
U la ong ba u Vice-Chancellor (in-charge) u don tang khyndiat ka bor ha ka ban pyntreikam ia ki kam baroh jong ka University, kaba wanrah ia ka jingsahkut ki kam ki jam bad kaba kham kongsan ka long ka jingthungkam iaki kam bala pynbna.
U Dr Synrem u la pyntip ba ka jingdon ki nongtrei hapoh ka University kala nang duna suna katba nang iaid ka por na ba bun ki lanongtrei kin sa shongthait noh hadien ba kynjoh 50 snem lane tam.
“Ngi la pyntip sha u Myntri ka tnat Pule Puthi ba lada ym lah ban thung kam noh kloi, ki kam hapoh NEHU kin sa sahkut lut” u la bynrap.
