Shillong , April 11: Ki riewngeit Muslim kiba shong ba sah ha jylla Meghalaya hynne ka sngi Palei, kila rakhe ia ka Eid-ul-Fitr- kaba dei ka jingkut jong u bnai ba khuid ki Muslim uba la tip kum ka Ramadan.
Da ki hajar ngut ki khynnah, samla bad ki rangbah kiba la phong ia ki jain kiba thymmai kila leit buh jingduwai ha ki Eidgah bad ki Mosque kiba don ha Shillong, Dawki, Nongpoh, Lad Rymbai, Byrnihat bad ha rilum Garo.
Ka jingrakhe ia kane ka niam kaba heh duh kadei ha ka Eidgah kaba don ha Laban kaba la shna da ka iit kaba dei kaba nyngkong tam hapoh ka ri India kaba la tip kum ka Madina Masjid, ha kaba palat 10,000 ngut ki riewngeit kila leit ban buh jingduwai kyrpang.
Hadien ba la dep ka buh jingduwai, ki riewngeit Muslim kila leitkai ruh sha ka iing jong ki bahaiing bahasem bad ki baieod bathoin ban leit ai khublei ha kane ka sngi ba kyrpang bad kine kiba leitkai kila ioh ia ki jingbam “sheer khorma” bad kiwei kiwei.
Na ka jingdon ki paid hapoh ka jylla Meghalaya, ki Muslim ki don 4 bad kiba bun hi ki nongshong shnong kidei ki riewngeit Khristan.
