Jowai, Iaiong 11: Ha ryngkat bad ka pyrthei baroh kawei, ki riewngeit Muslim kila rakhe iaka Eid Ul-Fitr ha Jowai kaba dei ka jingkut jong u bnai ba shah thngan lane ka Ramadan.
Ka Eid al-Fitr ka hap haka sngi nyngkong jong ka Shawwal jong ki riewngeit Muslim bad kane kam hap lang haka almanac jong ka Gregorian namar ka sngi ka sdang na u bnai lunar Hijri ka pher katkum ka jingmih bnai thymmai ha man ki riewngeit.
Ha kane ka lehniam, ki rangbah, ki kynthei bad ki khynnah ki phong jain thymmai ban rakhe iaka jinglong shipara wat hapdeng kiba duk bad riewspah.
Ki riewngeit na kylleng ka West Jaiñtia Hills kila ialum lang ha Masjid kaba don ha Chahtngit, Iawmusiang, Jowai ban ainguh Namaz haka jinglam khmat Imam, Maulana Hussain Ahmed.
