Bthah ia u CS bad DGP ban peit pyrman ia ka suk ka sain ha Shillong
Shillong, Iaiong 11 : U Myntri Rangbah ka Jylla Conrad K Sangma ula pyntip ha ka sngi Palei, ba ki Pulit kila buddien bha ia ki riew runar kiba donkti ha ka jingbom iap ia uwei u nongbylla bar Jylla ha Mawlai Mawroh myn ha ka sngi Balang.
Haba iakren bad ki nongthoh khubor, u Myntri Rangbah ula pynrem ia kane ka jingthombor bad ong ba ka jingtohkit kala iaid shakhmat ban iohkem ia ki runar khnang ba kin ioh ia ka jingpynsajia kat kum ki kyndon ain.
U Conrad ula pyntip ba ula iakren ruh bad ki bahaiing jong une u lanot ban pynpaw ia ka jingsngewlem bad kular ba ka Sorkar kan shimkhia bha ia kane ka jingjia bad ban pynthikna ba ki riew bymman kin ym lait na ka ain.
Nalor kane, u Myntri Rangbah ula pyntip ba ula khot ia u Chief Secretary bad u Director General of Police (DGP) sha ka jingialang bad bthah ba kin peit pyrman bad pyrtkhing bha ia ka jinglong jingman ka suk ka sain ha Shillong bad kiwei kiwei ki jaka.
Khnang ban pynthikna ia ka jingpeitngor bha ia ka jinglong jingman, u Myntri Rangbah ula pyntip ba ka Sorkar kan sa phah ia ki bor pahara bad lada donkam, kan sa pan shuh shuh ia ki bor pahara.
Lah ban kdew hangne ba uwei u nongbylla bar jylla na Nongmynsong ula shah shoh haban da iap ha ki riew runar ha Mawlai Mawroh, Shillong.
Kat kum ka jingong u Superintendent of Police Rituraj Ravi, kane ka jingjia kala jia ha ka step sngi Balang por 11:15 baje.
Une uba iap u kyrteng u Arjun Ray ba 52 snem ka rta.
