Nongpoh, Nailur 11: Ka sengriewlum United Democratic Party (UDP) Ri-Bhoi District, hynne ka sngi Nyngkong, kala rakhe ia ka jingdap 26 snem ha ka jingshakri ia ka Jylla lyngba ki kam sain hima sima, daka leit ai jingiarap ia ki Khunswet ka District.
Ka UDP-Ri-Bhoi kala leit ai jingiarap da ki mar bam sha ka jaka ri Ri-Khunswet bala tip kum ka Children’s Home kaba don ha Mawsyntai bad kaba pyniaid da ka Ri-Bhoi Presbyterian Synod.
Ia kane ka kynhun ka UDP la ialam da u bah Balajied Rani MDC ka Nongpoh u ba dei ruh u Vice President ka UDP Ribhoi haka jingïadon lang u bah Micheal Kharhunai, Secretary ka UDP Ribhoi, u bah Lastfurius Marngar, President Youth Wings UDP Ribhoi, Jeffrey Khymdeit Organising Secretary UDP Ribhoi lem bad kiwei kiwei .
U Bah Balajied Rani, haba kren ha katei ka sngi u la pynpaw ïaka jingkmen ba kum ka party kan ïoh ïaka lad ban pan pynpoi ïaki jingïarap sha ki jaka kiba donkam eh.
U la ong ba ha kum kane ka sngi sah jingkynmaw ïa ka jingdap kaba 26 snem jong ka seng UDP ki la shim ïa kane ka sien jam da kaba kner ïaka kti sha ki ba donkam.
U bah Balajied u la ong ruh, haka jingshisha kum ki nongïalam ki la don ka jingthmu ban ïalehkmen lem bad ki heprit kiba sah ha kane ka jaka hynrei namar ba ka dei ka por long skul ki khlem ïoh ïa ka lad ban ïa kynduh bad ki.
