Shillong, Nailur 09: Ka Tura Government College hynne ka sngi kala rakhe iaka Foundation Day ba 65th haka jingdon lang u Lamphang ka ïng dorbar thaw ain Thomas A. Sangma, u Myntri ka tnat PHE Marcuise N. Marak, u Myntri ka tnat pule puthi u Rakkam A. Sangma, u Advisor ka tnat pule bah H.M Shangpliang bad u Ambrose Ch. Marak Secretary ka tnat pule lem bad ki samla pule kiba rim.
U Myntri Rangbah ka jylla u Conrad K. Sangma u khlem lah ban wan shim bynta sha kane ka jingialang namar ka jingbunkam haka jingialang G20 Summit kaba long ha nongbah New Delhi.
Haba kren ha kane ka sngi u Myntri ka tnat pule puthi Rakkam A Sangma ula ai ka jingiaroh iaki nonghikai haka ba ula kynmaw ruh iaki sngi haka por ba u dang don ha College. U Rakkam ula kren ruh halor ka NEP 2020 bad ia ka jingmyntoi ba kane ka Policy ka wanrah naka bynta ki samla pule.
Naka liang u Lamphang ka ïing dorbar Thomas A. Sangma ula kren halor ka jinglah ki College ban kyntiew iaka imlang sahlang bad ula ai ka jingkhublei iaki nongseng ia kane ka College kiba la iohi jngai naka bynta ka jingdonkam ki samla pule hapoh ka thain rilum Garo Hills khamtam haka por ba kane ka thain ka dang sahdien bha.
Ha kane ka sngi, la pynkupburom iaki bahaïing hasem jong ki nongseng ia kane ka Tura Government College daki Mementos.
Iaka Tura Government College la seng haka 9 tarik Nailur 1958 ban kyntiew iaka pule puthi jong ki khun samla ka thain Garo Hills bad ia kane ka College la seng katkum ka jingiohi jngai daki nongiakam ba paw ka thain ba kynthup u Mody K. Marak, Harrison W. Momin, Rangam G. Momin, Ranjit S. Marak, Suresh Das, Dolbir Lohar, Rabilal Jaisi bad ka Sodini G. Momin haka jingialam lynti da u Capt. Williamson A. Sangma u myntri rangbah ba nyngkongeh ka jylla Meghalaya.
Iaka College la Provincialized ha u bnai Naitung 1967 daka sorkar Assam bad hadien baka Meghalaya kala ioh jylla ba pura ha u snem 1972, ia kane ka College la pynrung noh hapoh ka skulbah North Eastern Hill University.
Kane ka College ka don hapoh ka nongbah Tura bad ka jaka ka long kaba heh bad don ki jaka lehkai ba kynthup ka Basketball Court, ki Hostel naka bynta ki samla pule synrang bad kynthei bad ki jaka sah jong ki nonghikai.
Naduh bala seng ia akne ka College, ka thong kadei hi ban kyntiew iaka pule puthi hapoh ka thain Garo Hills bad ka jylla baroh kawei.
