Shillong Nailur 02: Ki longkmie ka shnong Tyrsad Umkseh kiba don ha ka Sarajanai Village Organization kaba kynthup iaki 13 tylli ki Self Help Group (SHG), kila rakhe ia ka lyngkhuh dap shisnem ha ka 1 tarik Risaw ha Tyrsad.
Ia kane ka jingrakhe la pynlong ha Seng Khasi Secondary School, Tyrsad Umkseh bad la pynshong kun ia ka da ka jingiadonlang u MDC ka Thain uba dei ruh u Chairman ka KHADC Bah Lamphrang Blah.
U Bah Lamphrang haba ai jingkren kum u kongsan u la ong ba ka jingdap shisnem ka VO ka long shisha ka jingjop bad ka pynklet ia ki jingeh kaba kila mad haba ki sdang ban pyntyllun ia ka kam.
U Bah Staising Kharbteng uwei na ki riew rangbah ba pawkhmat ka thaiñ, ula pynpaw ba dei lyngba ka jingiohi jngai ki nongialam ka Ri kiba la shimkhia ban pynkupbor ia ki longkmie ba kin lah ban ïeng hala ki jong ki kjat da kaba thaw ia ka National Rural Livelihood Mission hapoh ka Tnat Pynroi Nongkyndong ne Ministry of Rural Development ban kyrshan ia ki Self Help Group hapoh ka lama ki Village Organization.
U ong ba kane kala plie lad ia ki longkmie ban pyntyllun ia ki kam ban seng ia kum kine ki kynhun ki ban kyntiew ia ka kamai kajih jong ki.
Ha katei ka jingrakhe la ioh ruh iaka jingkren na u Bah Manikstar Umdor, Sirdar ka Pamsangut Sirdarship, u Assistant Rangbah Shnong ka shnong Tyrsad Umkseh Bah Shan Kharryngki, u Bah Simple Rani na ka liang ka Seng Samla, u Bah Shalenstar Rani na ka KSU Tyrsad Umkseh Unit bad kiwei kiwei.
La pynshitrhem ia katei ka jingrakhe da ki jingpynbyrngia na ki Self Help Groups kiba la ai ia ki jingrwai, ki jingshad bad ki skit kiba kit jingmut ban iatei ia ka imlang sahlang bad u Kongsan ula ot ruh ia u Cake kum ka jingdap shisnem jongka seng.
