Shillong, Jan 26: Ka jylla Meghalaya kala iasnohkti lang bad ka ri baroh kawei ha kaban rakhe ia ka Republic Day kaba 77 da ka jingkmen bad jingieid ri ha Madan Polo hynne ka sngi Nyngkong.
U Lat ka jylla u C H Vijayashankar ula pynher ia ka lama jong ka ri bad shim ruh ia ka Salute na ki kynhun kiba la iashimbynta ha ka Parade kiba kynthup ia ki pulit jong ka Sorkar Jylla bad Sorkar Pdeng, ki dkhot jong ka NCC bad ki khynnah skul.
Haba ai jingkren u Lat ula pynpaw ba ka Meghalaya kala kylla long kum kawei na ki jylla ha ka ri India kaba la kiew sted bha, kaba la ioh ia ka rekod ia ka jingkiew ka GSDP kaba 9.66% ha u snem 2025 bad kaba la pynneh 3 snem lynter ia ka jingkiew kaba 10% hadien jong ka jongsaphriang ka khlam COVID-19. Ula ong ba ka jylla ka iengskhem ha ka lynti ban kyntiew lai shah ia ka ioh ka kot hapoh u snem 2032, kaban iaid ryngkat bad ka Viksit Bharat.
U Lat ula ong ba kala don ka shongsuk shongsain ha kine ki snem kiba la dep da ka jingshimkhia ia ki sienjam ha kaba iadei hapdeng ka jylla Assam bad Meghalaya bad ka jingpynkhlain ia ka jingiatreilang bad ki BSF ha ki thain khappud bad ka ri Bangladesh. Ula pynpaw ba ka sorkar kala wanrah ia ka jingkylla da kaba kdew ba kala don ka jingshakri kaba sted lyngba ka Meghalaya Right to Public Services Act, ka jingpyniar ia ki jingai jingshakri ia ki nongshong shnong bad ki rynsan Digital kum ka Meghalaya One bad CM Connect, kaba la shimkhia ia ka jingpynpaw ia ka jingeh jongki 43,000 ngut ki paodbah.
Haba kren ha kaba iadei bad ka jingroi jong ki jingtei, u Vijayashankar ula pynpaw ia ka jingtei 3,500 km ki surok ha ki thain nongkyndong, ka jingthaw ia ka rekod ha ka jingmang T.2,200 Klur ia ka state road project, ka jingpyniar ia ka jingpyniasoh lyngba ka liengsuin bad ka jingiaid shakhmat ki projek kiba kongsan kaba kynthup ia ka Shillong–Silchar Greenfield Corridor. Ula kdew ruh ia ki jingkiew ha ka koit ka khiah, ka pule puthi, IT, kam jngohkai bad ki kam ialehkai kynthup ia ka jingthmu ban pynlong ia ka 39th National Games ha u 2027, ban pynbha ia ki kyrdan ai jingshakri ha ki hospital bad ka jingkiew ka Meghalaya ha ka IT bad ka jingkamai lyngba ki Concert.
Ha kane ka jingialang, u Lat ula aiti ia ka khusnam Tirot Sing Award ha ka Arts and Literature ia u Dr Kynpham Sing Nongkynrih, ka Pa Togan N Sangma Award ha ka Social Service ia u Father Benoy Joseph bad ka Kiang Nangbah Award ha ka Sports and Games ia Riiohlang Dhar.
Ula pynkup burom ruh ia u nongioh ia ka khusnam Padma Shri u Bah Hally War, da kaba ai jingthuh ia ka kam kaba ula maitphang ha kaban thain ia ki jingkieng diengjri ha Sohra, ban pynkhlain ia ka jingai jingshakri ha ka shnong ka thaw bad ia ka mariang.
La pynbna ruh ia ka kyrteng jong ka Jubi Gabil Momin DIG kaba ioh ia ka President’s Medal, ka Police Medal ia u Bah Bashanborlang J Laloo uba long u Commandant bad u Babu Chow Sinha uba dei u Sub-Inspector.
Ha kane ka jingrakhe la pyninam ruh ia ki tabut kiba la pynkhreh da ki tnad sorkar, ha kaba ka Directorate of Mineral Resources kala jop ia ka kyrdan kaba nyngkong, bud pat da ka Tnad Tourism Department bad ka District Rural Development Agency (DRDA).
Ha ka march-past, ka Phudmuri Presbyterian Higher Secondary School kala ioh ia ka kyrdan kaba nyngkong, katba ka BDW International School kala wan baar bad ka Assam Rifles Public School kala wan balai.
La ioh ruh ia ka jingpyninam ia ka kolshor da ka Infinity Choir bad la nang pyniphuh iphieng da ka Nongrah Presbyterian Secondary School.
La sam ia ki khusnam da u Symbud Myntri Rangbah ka jylla u Bah Sniawbhalang Dhar.
Haba pynkut ia ka jingkren, u Lat ka Jylla ula kyntu ia ki nongshong shnong ba kin iashimbynta ha kaban tei ia ka jingkhuid, ka jinglong salonsar bad ka jingpynneh pynsah ia ka Meghalaya bad ka kyntu ban donlang ia ka jingkitkhlieh kum ka jylla kaban jam shaphrang ha kaban ia u mawmer jong ka roi ka par.
