Shillong, Nailar 15 : Ka Jylla Meghalaya ha ryngkat ka Ri baroh kawei, hynne ka sngi Ba-ar, kala rakhe ia ka jingdap 77 snem ka jinglaitluid ka Ri hapdeng ki jingialang ba ishongkun bha bala pynlong kylleng ki jaka jong ka Jylla.
Hangne ha Shillong ka Nongbah ka Jylla, u Myntri Rangbah ka Jylla Conrad K Sangma ula pynher ia ka lama lai rong ka Ri bad shim ia ka Rashtriya Salute jong ki 18 tylli ki kynhun ba kynthup ia ki BSF, CRPF, MLP, Tripura State Rifles, Unitarian Hr. Secondary School Puriang, Holy Cross Secondary School, Nongmensong, Nongrah Secondary School, Nongrah, NCC boys and girls, Meghalaya Bharat Scouts and Guides, Laban Presbyterian Hr. Secondary School, Little Flower Secondary School, Seven Set Hr. Secondary School, BSF Sr. Secondary School, Auxilium Girls Hr. Secondary School, Brookside Adventist Hr. Secondary School, kynhun niah kulai ka Assam Rifles Higher Secondary School bad ka kynhun tem ka Border Wing Home Guards.
U Myntri Rangbah ula aiti ruh ia ka khusnam Arts and Craft Village Award sha ka Shnong Wahkhen, East Khasi Hills halor ka jingpynneh ia ka put ka tem nala tynrai bad ka sap thain kti da ki sien, ka shnong Larnai ha West Jaintia Hills halor ka jingshna ia ki khiew khyndew iong, ka shnong Pahambr ha Ri-Bhoi halor ki khana pateng, ka Tangmang, East Khasi Hills halor ka jingshna shylliah siej, ka Mairang halor ki kam thohdur, shna motdur, shna jingshna da kid ring bad ka Amindagre West Garo Hills kaba la bna nam halor ki kam shna jingshna da ki dieng bad ki maw.
U Myntri Rangbah ula aiti ruh ia ka khusnam State Literary Award jong u snem 2010 sha u (L) Dr Iarlington Kharkongor halor ka jingthoh ia ka kot Khasi “Ka Nongrim ban tei bad tehsong ia ka iing ka sem ka Ri bad Jaidbynriew” bad u (L) BS Bangshall uba thoh ia ka kot Garo “Sonajing’. I aka State Literary Award u snem 2011 la ai sha u (L) Dr JS Shangpliang halor ka kot Khasi “Ka Khet” bad u Lwellyn R Marak halor ka kpt Garo “Pagitchamrangi Agana”.
Ha kane ka sngi, la sam ruh ia ka khusnam sha kiba nongjop jong ka March Past kiba iashimbynta ha ka jingrakhe ia ka I-Day ha kaba ia ka nam ba nyngkong la ioh da ka Holy Cross Secondary School, Nongmensong, ka 1st Runners up sha ka skul Adventist Hr Secondary School bad ka 2nd Runners Up sha ka Nongrah Presbyterian Secondary School.
Ka Deputy Commissioner ka East Khasi Hills kala aiti ia ka Kayakalp Award 2022-2023 jong ka East Khasi Hills sha ka Ganesh Das Govt. Ka MCH Hospital kala ioh ia ka best District Hospital bad Eco Friendly District Hospital, ka Civil Hospital kala ioh ia ka Commendation award ka District Hospital, ka Sohra CHC ia ka best CHC bad Eco-Friendly award, ka Mawphlang CHC bad Sohiong CHC ia ka CHC award, Thynroit HWC-SC bad Thangsning HWC-SC kila ioh nyngkong bad ba-ar ha ka HWC-SC, Kharang HWC-SC bad kiwei kiwei.
Ka East Khasi Hills District Social Welfare Office kala pynkup ia ka DSWP Award sha ka kog Saduka Rangad, Probation Officer, Special Home, Boys, Mawkasiang, New Shillong halr ka jingtrei shitom bad aiti ha ka kam ban shakri ia ki Khynnah kiba donkam jingiada.
La pynbna ruh ia ka Police Medal for Meritorious Service Awardees ha kaba ki nongioh khusnam ki kynthup ia u Lumlang John Malngiang, Havildar, East Jaintia Hills DEF bad Shri Ram Phawa, Havildar, Police Taining School, Umran. Kiba ioh ia ka khusnam Union Home Minister’s Medal for Excellence in Investigation jong u snem 2023 ka dei ka Salmay R Marak, Sub Inspector, West Garo Hills DEF.
Ia ka Fire Service Medal for Meritorious Service Awardees la pynbna ha kaba u Dawrupaia Passah, Leading Fireman bad u Iengborsing Majaw, Fireman kila ioh ia ka khusnam.
I aka khusnam President’s Home Guards & Civil Defence Medal for Distinguished Service la ioh da u Merinpole Koksi Sangma, Joint Director ka Civil Defence. Iaka Home Guards & Civil Defence Medals for Meritorious Service la ioh da u Bakstar Mynsong, Sub Inspector (HG) bad u Ram Charles Lamare, Havildar (HG).
Ha kane ka jingrakhe la don ruh ki cultural program jong ki khynnah skul ka St.Mary’s Higher Secondary School, ka Shillong Public School, Sein Raij Secondary School, Holy Cross Secondary School and Government Girl Hr. Secondary School.
Pule ruh: Pynbna u Conrad ia ka CM-CONNECT, ban rah ia ka jingshakri ka Sorkar sha man ki thliew Iing
