Ka KSU ka kloi ban len ia la ka jingim wat ban shim ia ka jingim jong kiwei kiba pynkylla Langïong paradoh parasnam
Shillong, Naitung 17: Ka Khasi Student Union (KSU) hynne ka sngi Thohdieng kala pynlong ia ka jingkynmaw burom ia ka lyngkhuh sngi iap kaba 191 jong u Tirot Sing Syiem, da ka ba pynlong ia ka jingialang ha u Motsahnam jong une u Khla Wait ka Ri uba don ha Madan Iewrynghep, Laitumkhrah.
Ha kane ka jingkynmaw burom la wan ban iashimbynta da ki nongialam ka KSU kiba mynta bad kiba rim, ki nongialam na ka Federation of Khasi Jaintia and Garo Peoples, North East Students Organisation bad kiwei kiwei.
Haba kren ha ka jingialang u President ka KSU u Samla Raymond Kharjana ula ong, ba ka KSU ka pynpaw ka jingsngewnguh iaka rai jong ka Sorkar Jylla ban mynjur da ka Resolution ban pyrshah tih Uranium hapoh ka Jylla Meghalaya hynrei ula ban jur ba ka jing mynjur iaka Resolution kam dei ka lynti kaba la kut halor kane ka mat.
Ula ong, hadien ba ka seng kala sdang ban khyllie biang ia kane ka mat, kala shem ba kiba bun ki riew pawkhmat jong ka Jylla kila sdang ban hiar sha ka thain Domiasiat South West Khasi Hills ban pyntieng pynsmiej ia ki paradoh parasnam.
“Hoid ngi sngewthuh bad ngi iohi ba ka Sorkar kan mynjur ia kata ka Resolution hynrei kaba kongsan ka long baka Sorkar kadei ban pynlong iaka jingtih bniah ba balei kita ki riew shimet ki sdang ban shim iaki jaka ha kitei ki thain” la ong u samla Raymond.
“Ka KSU kam tieng ban phla iala ka jong ka jingim bad kam kynran dien ban shim ia ka jingim jong ki mynder ri kiba thmu ban pynkylla langiong iaki paradoh parasnam jong ka ri bad ka jaidbynriew” la ong u Nongialam ka KSU bad ka bynrap, dang shen ka KSU kala iakynduh ia u Myntri Rangbah bad kala ban jur ba ka Jylla haduh mynta kam don kano kano ka aiñ ban tehlakam ia ka jingwan rung ki mynder ri sha kane ka Jylla.
“Kala dei ka por ba ka Sorkar kan pyni ia kata ka jingshim khia bad ka jingkitkhlieh namar kumba ngi ong ba ka jaidbynriew jong ngi kadei kaba rit paid bad ngi don haka jinglong syier ioh ha kawei ka sngi ngin shah tyllup bad jah noh na kane ka snieh jong ka pyrthei” la ong u President ka KSU.
“Haba ngi iakren iaka Resolution jong ka ILP, haduh mynta mynne ngi dang sah haka umdum. Nangne shakhmat ngin long kiba adkar namar ngi la iohi ba la Pass iaka Resolution na kawei ka por sha kawei pat hynrei ngim shym la iohi ia u soh jong ka jingjop wat hadien bala Pass iaka Resolution” ula ong.
