Shillong, Nohprah 18: U Lat ka jylla u CH Vijayashankar hynne ka sngi u la iashimbynta haka sngi kynmaw burom ïa ka lyngkhuh snem ïap ba 84 jong u nongthoh kot ba pawnam ka Jylla U Soso Tham kaba la pynlong ha U Soso Tham Auditorium, State Central Library, Shillong.
Ha kane ka sngi leh burom ïa U Soso Tham, la wan iashim bynta da ki paidbah, ki samla pule, ki riew shemphang, bad ki riew ieid thoh kot kiba la wan ban kynmaw iaka jingim bad ka pateng jong U Soso Tham.
Ha ba ai jingkren ha kane ka sngi u Lat ka Jylla u la ai ka burom ia utei u riew pawkhmat ha ka thoh ka tar, uba ki jingnoh synniang jong u, ki la ieh ia ka dak ka ba ym lah ban pyndam ha ka kolshor bad ka pateng thoh ka tar jong ka jylla Meghalaya.
Ki kam jong U Soso Tham haka thoh ka tar, ki pynpaw ia ki riti dustur, ka kolshor, bad ki jingangnud jong ka jaitbynriew Khasi, ki dang iai bteng ban ai mynsiem ia ka pateng bad ki pateng ban wan.
U Lat u la pynpaw ïa ka jingdonkam ban pynneh pynsah bad kyntiew ïa ka riti dustur ba riewspah jong ka jylla, da kaba pynksan ba ki kam jong U Soso Tham bad kiwei ki riew khraw ki dei ban ïai bteng ban ïalam bad pynwan dur ïa ki pateng ban wan jong ka Jylla bad ka Ri.
Ha kane ka jingïalang la pyni ruh ïa ka kolshor kaba kynthup ïa ki jingshad ba la pynshong nongrim na ki poitri jong U Soso Tham, kaba pynim ïa ka pateng ka thoh kot jong u.
Ka jingrakhe 84 snem jong ka jingïap U Soso Tham ka la long ka por kaba kongsan ban pyrkhat ïa ki jingnoh synñiang jong u myllung ba khraw bad ban pynskhem biang ïa ka jingangnud jong ka jylla ban pynneh pynsah ïa ka jinglong kyrpang jong ka kolshor.
