Shillong, Nohprah 18: U MLA ka United Democratic Party (UDP) na Mawsynram Constituency Bah Ollan Singh Suin, ula kyntu ia ka sorkar ba kan tuklar bad khmih bniah ia ka jingbyrngem jong ka kynhun Hindu- Kutumba Suraksha Parishad, ban khang ia ka surok lada ym ailad noh ia ka jinglehniam ki Hindu hapoh ka Krem Mawjymbuin hapoh jongka 23 tarik u Nohprah.
“Namar ka kynhun kala dep ban byrngem ban pynlong ia ka jingiakhih da kaba pakhang surok. Nga tharai ba ka sorkar ka dei ban tuklar bad khmih bniah ia ka” ong u Bah Suin haba iakren bad ki nongthoh khubor ha ka sngi Baar.
Ka dawbah jong ka kynrum kynrram kala mih kadei hadien ba ka KSP kala dawa ba dei ban ailad ia ki riewngeit Hindu ban lehniam hapoh jong ka Krem Mawjymbuin, kaba pawnam ia ka jingdon ia u maw uba iasyriem bad u Shivaling. Ka Dorbar Shnong, ha kaba nyngkong kala kyntait ban ai ia ka No Objection Certificate (NOC) ban pynlong ia ka jinglehniam bad ki bor pyniaid district ruh kila ieng lang halor katei ka rai.
“Kine ki kynhun kila pynmih ia kane ka mat ha ki katto katne bnai kiba la dep bad ki bor pyniaid district kila pan jingbit shwa na ka Dorbar Shnong hynrei kala kyntait ban ai ia ka NOC. Ki bor pyniaid district kila hap ban iaid ryngkat bad ka rai jongka Dorbar Shnong ban ym shah ban pynlong ia kino kino ki jinglehniam leh rukom hapoh kane ka krem” ong u Bah Suin.
Kane ka kam kala poi sha ka iingkashari Meghalaya High Court, kaba la bthah ia ki bor district ban thaw ia ka committee kaban kynthup ia ki nongmihkhmat na ka tnad Jngohkai, Dorbar Shnong bad ki bor pyniaid district ban pynbeit ia katei ka kam. U Bah Suin ula pynpaw ba ka Dorbar Shnong ka iengskhem ha ka rai kaba kala shim.
“Ka Dorbar Shnong ka ieng beit ha ka rai ban ym shah ban leh ia kano kano ka jinglehniam lehrukom hapoh ka Krem Mawjymbuin. Ia kane ka mat la pyntip sha ka ophis ka jong nga” ula ong.
Haba batai shaphang ka kamram jong ka Dorbar, u Bah Suin ula ong namar ba ka krem ka hap hapoh u pud u sam jongka Dorbar Shnong, kunta ki bor kiba nabar kim lah ban iaid lait ia ki rai ki jongka.
 na Mawsynram Constituency Bah Ollan Singh Suin, ula kyntu ia ka sorkar ba kan tuklar bad khmih bniah ia ka jingbyrngem jong ka kynhun Hindu- Kutumba Suraksha Parishad, ban khang ia ka surok lada ym ailad noh ia ka jinglehniam ki Hindu hapoh ka Krem Mawjymbuin hapoh jongka 23 tarik u Nohprah.){kind=link}