Shillong, Nohprah 01: U Myntri Rangbah ka Jylla u Conrad K. Sangma ha ka sngi Nyngkong, ula plie ia ka 6th Meghalaya Saras Aajeevika Fair 2025 kaba la pynlong ha Soso Tham Auditorium, ha kaba la pyninam ia ka jingialeh kaba jai jai, kaba la ialam da ki longkmie na nongkyndong ha kylleng ka jylla.
U Myntri uba khmih ia ka Rural Development u Bah Sosthenes Sohtun bad kiwei kiwei ki heh sorkar kila wan ban iadonlang ha kane ka jingrakhe.
Haba khot ia ki Self-Help Group (SHG) kaba la ialam da ki longkmie ba kadei kawei na ki jingiakhih kaba la wanrah ia ka jingkylla ha ka Meghalaya lyngba ki prokram ha ki shnong ki thaw, u Conrad Sangma ula ong, kane ka sienjam kala pynkylla dur ia ka ioh ka kot ha ki shnong ha ryngkat bad ka jingtrei shitom bad ka jinglong tynrai ha ka kolshor.
“Ka jingiakhih jong ki SHG kam dei eh tang halor ka jingkiew ka ioh ka kot, kadei halor ki longkmie kiba don nadien ka jongka, kiba iaishah bad ki lad kaba la thaw hi da ma ki bad kumjuh na ka bynta kiwei ruh” ula ong.
Haba kren halor ka jingiaid lynti ka jylla Meghalaya na ka jingjur ka jingkhlad ki longkmie kiba punkhun sha ka jingkiew shaphrang ki SHG kaba don ia ka jingiatreilang jong ki 55,000 tylli ki kynhun, u Myntri Rangbah ula ong, ba kane ka jingiakhih kadei kaba la kha na ka jingdonkam ban shimkhia ia ki jingeh kiba la don naduh tyllong ha ka imlang sahlang.
Ula pynpaw, ba ka sorkar ka donkam ban iaid shakhmat ym tang halor ki scheme hynrei wat ha kaba iadei bad ka bam ka dih kaba tei, ka jingdon ia ka jingpynwandur ia ka longiing longsem, ka kamai kajih bad ka jingpynkup bor ia ki longkmie, ki sienjam kiban iarap ia ki SHG ban kylla long kum ki jaka kiba khlain ha ki shnong ki thaw.
“Ka jingiakhih kala sdang da ka mishon ban iada iaka jingim jong ki kmie. Hynrei kala nang roi namar ba ki longkmie kila shah pynkup bor ha ka ioh ka kot bad ha ka imlang sahlang” la ong u Conrad Sangma.
Ula pyntip ba ka Meghalaya mynta kala wan baar ha ka jingkiew ha ka ioh ka kot hapoh ka ri bad ula aingnuh ia kane ka jingkiew ba kam dei satia tang da ka jingkynshew tyngka ne ka jingpynlut ka sorkar hynrei ban kyntiew ia ki jingsengkam sengjam ha ki shnong ki thaw.
“Ki SHG kila noh synniang kaba don jingmut bha ia ka ioh ka kot jong ka jylla Meghalaya. Ha kaba da ka jingdon ia ki jaka treikam kaba khlain, kila kylla long kum ki bor kiba la wanrah ia ka jingkylla” ula ong.
Ula banjur ia ka jingdonkam ban pynkhlain ia ki jaka treikam jong ki SHG bad ban kyntiew ia ki lad ki lynti ha ki kynhun kiba la ialam da ki longkmie, khnang ba kin lah ban leh ia ka bynta kaba khraw ha kaba pynwabndur ia ka ioh ka kot jong ka jylla ha ki snem kiban dang wan.
U Myntri Rangbah bad kiwei pat ki heh ki hain, kila pynkup burom bad ai khusnam sha ki Village Organisation kiba kyrshan ia ki prokram jong ka ICDS ia kaba ym shim la don ia ki Aganwadi Centre bad VO kiba la tei ruh ia ki Transit Homes na ka bynta ki longkmie kiba punkhun. La ai certificate ruh sha ki 15 ngut ki Volunteer kiba la trei met bad mynsiem ha kaba iadei bad ka jingiakob jongka Har Ghar Tiiranga Campaign.
La sam ruh ia ki 15 tylli ki Micro ATMS da ka jingiatreilang bad ka Meghalaya Rural Bank, ka jingaiti ia ka ram lyngba ka Cheque sha ki SHGS da kaba iatreilang bad ka MRB, ka jingsam ia ki Cold Chain Boxes sha ki Pashu Sakhis, ka jingsdang pyntreikam ha ka jylla ia ka Nayi Chetna, ka National Gender Equality and Women Empowerment bad ka jingsdang ia ki 50 tylli ki Integrated Farming Clusters kaba T.20 Klur, Lumlang Marketing Federation bad ka 6th Saras Aajeevilka Fair 2025.
Palat 60 tylli ki SHG bad ki nongsengkam ha Nongkyndong, kynthup ia ki nongiashimbynta kiba nabar ka Meghalaya, kila pyninam ia ki mar ki mata ki jongki.
