Shillong, Iaiong 11: Ka Bharatiya Janata Party (BJP) Meghalaya ha ka sngi Saitjain, kala rakhe ia ka 47th Foundation Day ha ka jingialang kaba la pynlong hapoh ka ophis treikam jong ka seng.
Kum shi bynta jong kane ka jingrakhe, ka BJP kala pynkup burom bad ai jingithuh ia ki riewpawkhmat, ki nongshong shnong kiba pawkhmat, ki nongialehkai bad kiwei kiwei kaba pyni ia ka jingiengskhem ka seng ha kaban ai jingithuh bad ban iadonbynta bad ki shnong ki thaw.
La wan ban iashimbynta ha kane ka jingrakhe da u Myntri Sorkar u Bah Sanbor Shullai, u MLA ka BJP u Bah AL Hek, ki nongialam ba la rangbah bad ki nongkitkam ka seng.
Ka Seng kala pynkup burom ia ki nongshong shnong, kiba kynthup ia u (L) Martin N Majaw ban ai jingithuh ia u kum u nongsaindur ia ka Land Transfer Act, 1971, ka Kong Trinity Saioo kaba la ioh pdiang ia ka khusnam Padma Shri halor u synniang uba kala noh, u Bah Imei Khonstid, u Sordar ka Raid Lyting (Phra Blang Khyriem Syiemship) bad ia u Rangbah Shnong ka Lyting Lyngdoh uba la shakri la 41 snem ban ai jingithuh ia ka jingtrei met bad mynsiem ha kaban ialam ia ka shnong ka thaw.
La pynkup burom ia u Salil Gewali, u nongthoh kot ba pawkhmat halor ka kot kaba pawnam tam ka jongu kaba la ai kyrteng “Great Minds of India.”
“Ngi dap da ka jingsngewsarong ban ai jingithuh ia kine ki jingjop jong kine ki riewshimet, kiba la wanrah nam bad burom ia ka jylla jong ngi” la pynpaw ka seng BJP.
Ha kane ka jingrakhe, la pynkup burom ruh ia ki 6 ngut ki nongialehkai kiba la ioh khur ia ka takma ksiar ha ka jingiakob siat khnam ha ka 1st Tribal Games kaba la long ha Raipur, Chhattisgarh bad ki nongialehkai Kickboxing kiba la ioh khur ar tylli ki takma ksiar, artylli ki takma rupa bad kawei ka takma rnong ha ka Asia Pacific Open Championship kaba la long ha Bali, Indonesia.
Ka seng kala pynkup burom ruh ia ki nongkitkam ka seng ne ki Karyakarta kiba la trei shitom bad noh synniang na ka bynta ka jingroi jong ka seng.
La sam ruh ia ki khusnam sha ki nongjop ha ka jingiakob Inter-College Speech Competition & Seminar, ha kaba ka Shillong Law College kala wan Nyngkong, ka Shillong College kala wan Baar bad ka KL Bajoria College kala wan Balai.
“Kane ka jingrakhe ka pyni ia ka jingiengskhem ka seng ban ai jingithuh ia ka jingwan shakhmat, ban ai mynsiem ia ki samla ba kin iashimbynta bad ban pynkhlain ia ka jingiadei ha ki shnong ki thaw” la pynpaw ka seng BJP.
Kane ka jingrakhe ka long ruh ka jingpynshisha ba ka seng ka ieng ha ka mysniem jong ka jingiatylli bad ka jingtrei da ka jingangnud.
 Meghalaya ha ka sngi Saitjain, kala rakhe ia ka 47th Foundation Day ha ka jingialang kaba la pynlong hapoh ka ophis treikam jong ka seng.){kind=link}