Umiam, Nailar 16 : Ka Dorbar Shnong Umiam kala rakhe ia ka Independence Day ba 78 jong ka Ri India, da kaba pynkup burom ia ki samla pule ka Shnong, kiba pass bha ha ki eksamin SSLC, HSSLC bad Degree nalor ka jingpynhap pyrda ia ka Independence Cup Football Tournament.
Ia kane ka jingrakhe la pynlong da ka Seng Samla Shnong Umiam ha ryngkat ka jingiatreilang bad ka Dorbar Shnong, ka Seng Longkmie jong ka Shnong bad kiwei kiwei.
Ia kane ka jingrakhe la pynshongkun da ka jingiadonlang u MDC ka Umroi Bah R Kharbuki kum u kongsan, u Bah TS Syiem, u Nongmihkhmat ka NESAC Anand Krishnan, u Secretary ka Umiam Industrial Association Guarav Bajaj, ki Heh Pulit ka Umiam Police Station bad kiwei kiwei.
Haba ai jingkren, u bah Kharbuki ula ai ka jingkhublei ia ki Nongialam Shnong bad Seng Samla kiba la shimkhia ban pyni phuh iphieng ia ka jingrakhe ia ka sngi Laitluid ba 78 jong ka Ri India.
U Bah Stevenson Kharkrang, Rangbah Shnong ka Umiam, u la pynpaw ia ka jingkmen kaba khraw ba kum ka Dorbar Shnong ha ka jinglamkhmat da ka Seng Samla, ka la lah ban pynurlong ia kane ka jingrakhe kyrpang ia ka Independence day 2024 kaba jop bad kaba iphuh iphieng, khamtam ka jinglah jong ka Dorbar Shnong ban shah pynkup burom kum ka Dorbar Shnong kaba leh khuid eh hapoh ka Ri Bhoi District hadien ka jingioh jingithuh na ka Ophis u Deputy Commissioner ka Ri Bhoi District ha kane ka sngi rakhe ia ka 78 Independence Day 2024.
Ha kane ka sngi, na ka liang ka Seng Samla Umiam ka la pynkup burom ia ki 6 ngut ki samla pule kiba la pass bha ha ka eksam SSLC, 17 ngut ha ka eksam HSSLC bad 6 ngut kiba la pass bha ha ka eksam Graduated.
Ha ka thup ialehkai football ba la tip kum ka Independence Day Cup football tournament, ka Kynhun jong ka Gate 11 ka la ioh khur ia ka nam lahduh da kaba pynliem noh ia ka kynhun jong ka United 11 da 5-4 kol ha ka jingiakhun phainal kaba la poi sha ka tie breaker.
