Shillong, Risaw 23 : U President barim ka Federation of Khasi Jaintia & Garo People (FKJGP) Bah Wellbirth Rani, ula rai ban kynran dien shuwa na ka jingthmu ban mih aireng kum u kyrtong ha ka elekshon MLA-2023 na Mawphlang Constituency.
U Bah Wellbirth uba la pyniasoh ialade sha ka United Democratic Party (UDP) bad bat ruh ia ka kam kum u Vice President ka UDP-East Khasi Hills District, ula pynthikna ba watla ula shim ia ka rai ban nym iakhun shuh ia ka elekshon, hynrei un dang iai neh bad ka UDP ban pynkhlain ia ka jingtreikam jong ka Party.
Lah ban pynkynmaw ba u Bah Wellbirth naduh ka sngi ba rung sha ka UDP kata ha ka 17 tarik Nailar, ula pynpaw ba ka jingwan pyniasoh ka dei na ka bynta ban pynkhlain ia ka party hynrei lada ka party ka ai ia ka ticket, u long uba la kloi ban mih aireng ha ka elekshon ban wan.
Na ki khubor ba iajan bad ka UDP, la iathuh ba u MLA ba mynta ka Mawphlang Bah Eugeneson Lyngdoh uba dei jong ka UDP, ula pynpaw ia ka jingartatien ban mih aireng biang ha kane ka elekshon MLA ban wan.
Ki Khubor ki iathuh ba ka UDP kala tip bniah ia kane bad dang shen kala leit ruh ban khroh ia ki briew na Mawphlang ba kin wan iasoh sha ka party bad ban mih iakhun ia ka elekshon na ka ticket jong ka UDP khlem da khein snep ia u Bah Wellbirth uba la bat lypa ia ka kam Nongialam ha ka party.
Ki khubor ki iathuh ba haduh mynta, ka UDP kam pat ioh satia ia ki kyrtong ban mih bujli ha ka jaka jong u Bah Eugeneson Lyngdoh.
