Shillong, Nailar 02 : Ki nongpynkhein ain kin hap ban siew mynta haduh T. 1 lak ka kuna lada shem ba ki pynkhein ia ka Meghalaya Identification Registration Safety and Security of Migrant Workers Act.
Ka Sorkar Jylla kala rai ruh ban pyndonkam ia ka Crime and Criminal Tracking Network System (CCTNS) ban talasi bad tih bniah ia ka jingim bad jinglong jong ki nongbylla bar jylla kiba wan rung shapoh ka Jylla.
Kane ka long kat kum ka Amendment bala tyrwa ha ka Act, 2020 bala mynjur da ka jingialang jong ka Kynhun Myntri kaba la pyniaid da u Myntri Rangbah ka Jylla Conrad K Sangma hynne ka sngi Thohdieng.
“Ka kynhun Myntri kala mynjur ia ka Amendment jong ka Meghalaya Identification Registration Safety and Security of Migrant Workers (MIRSSMW) Act, 2020 Dorbar ban wan jong ka Iingdorbar Thaw Ain ba kan ai jingmynjur” ong u nongai ktien bad Myntri Sorkar Bah Paul Lyngdoh haba iakren bad ki nongthoh khubor hadien ka jingialang.
Ula iathuh ba kane ka jingtyrwa kan pynheh ia ka kuna na ka T.5000 sha ka T. 1 lak pyrshah ia kito ki briew kiba pynkhein ia ka Act.
“Ia kito kiba la pynkhein bunsien, kan don ka jingset along kaba lah ban kot ym tam ia ka lai bnai” ong u Bah Paul.
U bah Paul ula pyntip ba ka kynhun Myntri kala mynjur ruh ia ka amendment jong ka Meghalaya Identification Registration Safety and Security of Migrant Workers Rules, 2020.
“Kawei na ki mat ba kongsan jong kane ka amendment ba thymmai ka long ba ka Sorkar kan pynkhlain ia ka rukom trekam ha kaban pyrrkhing bad wad jingtip ba bniah shaphang ka rukom im bad ka jinglong jong ki nongbylla bar jylla khnang ban pynthikna ba tang kito ki bym pat donkti kam bymman kin ioh ban wan trei bylla ha Meghalaya. Ka kynhun Myntri kala rai ba kan pyndonkam ia ka CCTNS” ula ong.
Kine ki jingpynkylla ia ka Ain kala mih hadien ka jingjur ka jingtalasi nongbylla bar jylla ba khlem kot khlem sla da ki kynhun Sengbhalang hapoh ka Jylla.
Haba kylli, u bah Paul ula ong “ Ngin pynthikna shuwa ia ka rukom im bad ka jinglong jong ki briew ba wan bylla khnang ba kin ym bynrap ia ka crimegraft ka Meghalaya. Lada kiba la donkti kam bymman, kaba kila leh hala ka jong ka Jylla, ia kum kine ki briew yn ym pdiang satia ba kin wan trei hangne”.
Haba pynpaw ba ka Meghalaya ka shaniah bha ia ka jingdonkam nongbylla nabar ka Jylla, ula ong “Kane ka dei namar ka jingduna ki nongbylla trai muluk bad kumta, ngi khmih lynti ba ka jingwan kan bun bha bad lada ngim pynthikna ia ka rukom im bad jinglong jong ki, kin sa long ki jingma ia ka jingsuk bad jingshngain jong ka Meghalaya”.
Kat kum ka jingong jong u, ki ar jait ki briew kiba wan sha Meghalaya ki dei ki nongshang suwari bad ki nongbylla.
