Shillong, Nailar 16: Ka KHNAM kala rai ban iakhih daka ba pynlong ia ka jingiashong kyllain mungor haka 19 tarik Nailar ha Madan Malki ban pynbor ia ka Sorkar ba kan pynduh noh ia ka Personal Interview ha ka thep kam Group B,C,D.
Haba pynbna ia kane shaki lad pathai khubor u Working President ka KHNAM, Bah Thomas Passah ula ong ba kane ka jingdawa ka dei ha ka ban pynthikna ba ka rukom thungkam thungjam hapoh ki tnat Sorkar kan long kaba khuid ba suba.
U Bah Thomas ula ong ba kane ka jingdawa pynduh iaka Personal Interview ka dei ruh ban pynduh pyndam iaka jingia thungkam tuh tang iaki bahaiing hasem ne kiba don jingiadei bad ki heh Sorkar.
“Ka KHNAM ka iawer ia baroh kiba sngewkhia halor kane naduh ki sengbhalang, ki samla wad kam bad ki kmie ki kpa ban wan kyrshan iaka KHNAM haka jingiakhih ban pynbor iaka Sorkar ” ula ong.
U Bah Thomas ula ong ba naduh u snem 2016, ka Sorkar Pdeng kala dep ban pynmih daka jingpyntip (Notification) ban pynduh iaka Personal Interview naka bynta ki kam Group B,C,D.
Ula iathuh ba 23 tylli ki Jylla hapoh ka Ri India kila pyntreikam iaka jingpynbna bala pynmih daka Sorkar Pdeng hynrei ha Meghalaya, haduh mynta kam pat shim iaki sienjam ban bud iaka jingbthah (Notification) jong ka Sorkar Pdeng.
