Tura, Nailar 17 : Ka Jylla kan pyndon burom khatduh ia u Myntri Rangbah barim ka Jylla Salseng C Marak, da ka ‘State Funeral’ ha Resubelpara Mini Stadium.
Ki kynrem ki lyndan bad ki heh ki hain nalor ki paidbah kin sa ialum lang ha kane ka madan ban pyndonkam burom khatduh ia une u Nongialam.
Ka jingleit ontep kan sdang na ka Iingsah u Salseng C Marak na Gajingpara ha ka por 12:05 baje janmiet bad nangne yn rah ia ka met sha Resubelpara Mini Stadium, ban pynlong ia ka jingialang pyndon burom.
La pynbeit ba hadien ka parade, yn pynbud da ka jingiabuh syntiew da ki kynrem ki lyndan bad ki jingkren ban pynkynmaw ia ki matti une u nongialam.
Ki Nongkren kiban ai jingkren ha kane ka sngi ki kynthup ia u Marthon J. Sangma, MLA na Mendipathar Constituency, T.D. Shira, MLA na Resubelpara Constituency, bad Saleng A. Sangma, MP ka Tura Parliamentary Constituency. Hadien kane, yn pule ruh ia ka kyrwoh na u Myntri Rangbah ka Jylla Conrad K Sangma.
Ia ka met jong u Salseng C Marak yn tep ha u lum jingtep ka Gajingpara.
