Guwahati, Lber 05 : Hadien 15 sngi ba kut ka jingaipor ia ki skul Missionary Khristan ba kin weng ia ki motdur u Jisu, ka Mary bad u Diengphna, katto katne ki kynhun niam Hindu kila byrngem ban leit mudui da ka mukotduma ha Guwahati High Court pyrshah ia kine ki Missionary namar ka jingleh ia ki kam ba pyrshah ia ka Ri India bad jingleh niam khristan ha ki skul Mission hapoh ka Jylla.
Kane ka kynhun ki Hindu ka dei kaba la ialam khmat da ka Kutumba Surakshy Parishad.
“Ka kynhun jong ki Seng Sanatan Hindu kila rai ban leit mudui sha Guwahati High Court bad ban file ia ka PIL halor ka kam ban weng ia ki jingleh niam bad jingpynieng mot niam na ki phyllaw iingskul” ong u President ka Kutumba Surakshya Parishad Satya Ranjan Borah haba iakren bad ki lad pathai khubor ha Guwahati Press Club hynne ka sngi Ba-ar.
Kine ki seng Hindu kila dawa ban weng ia baroh ki mot jong u Jisu Khrist bad ka Mary nalor ki diengphna na ki skul Mission.
Kane ka jingdawa kala mih hadien ka jingjia hapoh ka skul Mission-Calvary English School kaba don ha Balipara, Sonitpur District ha kaba uwei u khynnah 10 snem ula shah shoh bad shah pynshitom tang namar ka jingpynmih ia ka ktien “Jai Sri Ram” haba plie ia ka kot hapoh kamra shong klas. Kane ka jingjia kala jia ha ka 5 tarik u Rymphang.
“Kane ka jingjia kala pynkhein ia ka Juvenile Justice Act, Article 14,15 jong ka Riti Synshar ka Ri, ka New Education Policy ha ryngkat ka Article 51 (A) jong ka Riti Synshar ka Ri India” ong u Borah.
Ula ong ba hadien kane ka jingjia, ngi la pynpaw ia ka jingbym sngewtynnad bad ngi la thoh ruh ia bun ki shithi sha u Lat ka Jylla Assam, Myntri Rangbah. Chief Secretary bad u Archbishop ka Guwahati nalor u District Commissioner ka Sonitpur District. Hynrei u ong, ka long kaba sngewsih ia ka jingbym don jingkitkhlieh bad jingleh bym suidniew jong ka Sorkar Assam halor kane ka jingjia.
Kane ka kam ka dei kaba la iakren ruh ha ka Iingdorbar Thaw Ain jong ka Meghalaya ha ka 27 tarik Rymphang ha kaba u Myntri Rangbah ka Jylla Conrad K Sangma ula ong ba ka Sorkar Jylla kan pynshisha shuwa ia ka khubor halor ka jingthombor ia ki skul Mission ha Assam shuwa ba un iakren bad ki bor Sorkar ha Dispur bad ha kajuh ka por ula kular ban ai ia ka jingiada bad jingshngain ia ki paidbah kiba sah ha khappud ki ar Jylla.
“Ngi la jubab da ka emai ba kwah ban iakren bad u Myntri Rangbah ka Meghalaya ruh halor kane ka jingsngewkhia jong ngi. Hynrei ym don mano manor uh ba kwah ban pynbeit ia kane ka kam haduh mynta” ong u Borah.
“Kumta ngi la rai ban leit mudui sha Gauhati High Court bad ban file da ka PIL ban weng noh ia ki jinglehniam bad ka jing buh mot niam ha ki phyllaw iingskul” ula ong.
