Tura, Naitung 11: Ki Seng Garo Kiba don hapoh ka lama jong ka Joint Action Committee of Mallangkona ryngkat bad ki sengbhalang ka thain, kila pynbna ba kin leit mudui noh sha Iingkashari Supreme Court pyrshah ia ka soskular pynbeit pud bala iasoi hapdeng ka sorkar Meghalaya bad Assam.
Ia kane ka rai ban iakhun pyrshah ia ka soskular pynbeit pud la pynbna lyngba ka jingiakynduhlang online ia ki lad pathai ba la pyn long da ki saw tylli ki kynhun sengbhalang kata ka FKJGP, AYWO, FAF bad ADE hynnin ka sngi U Blei.
U President ka FKJGP Pritam Marak ula pyntip ba ka JAC Mallangkona kan iakhun pyrshah ia ka jingiasoi ia ka MoU hapdeng ka sorkar Assam bad Meghalaya.
U pyntip ba ka JAC kala rai ban leit mudui sha Supreme Court namar ba ka Regional Committee ba pynkhreh ia ka soskular kala buh ia ki paidbah ba sah ha ka thain ba jur ka jingiakajia shabar na ki jingtip halor kane ka soskular.
U Pritam ula kynnoh ba ka Regional Committee kam shym la iakynduh ne iakren bad ki paidbah nongshongshnong halor ki jingtyrwa ba don ha ka soskular lane leh ia ka sorjamin da ka jingiasngew thuh jingmut lang bad ki nongshongshnong.
Kat kum ka jingong une u nongialam ka FKJGP, ki don palat 11 tylli ki shnong ki bym kwah satia ban leit sha Assam.
Kumta kila jied ban leit sha Supreme Court ha ka jaka Jong ka High Court ban iakhun da ka mukotduma pyrshah ia ka sorkar khamtam ba kane ka kam ka dei ruh kaba iatakhuh bad artylli ki Jylla.
Kine ki Nongialam kila pyntip ba ka JAC kala rai mynta ban pan synniang pisa na ki paidbah bad kala plie ia ka joint account ba ki paidbah kin synniang sngewbha sha ka jingpynlut pyndep ban iakhun mukotduma ha kane ka Iingkashari ba hakhlieh duh ka Ri.
Kine ki Nongialam ki pyntip ba ki jingpynkhreh ia ka mukotduma kala dep lut mynta bad ka kynhun ki nongiasaid ain ka Iingkashari Supreme Court kila mynjur ban pyn iasaid ia kane ka kam.
