Shillong, Naiwieng 04 : Ka Sorkar Meghalaya Democratic Alliance (MDA) kala rai ban rah iakren ia ka jingdawa Inner Line Permit (ILP) bad ka jingpynrung ia ka ktien Khasi bad Garo ha ka khyrnit ba phra jong ka Riti Synshar ka Ri bad u Myntri kam Pohiing ka Ri u Amit shah, uban sa wan iuhkjat shen ha Jylla.
U Symbud Myntri Rangbah ka Jylla Bah Prestone Tynsong haba iakren bad ki nongthoh khubor hynne ka sngi thohdieng, ula ong ba ka Sorkar Jylla kala ioh ktien ba u Myntri kam Pohiing un sa wan iuhkjat ha kano kano ka por ha Shillong lehse ha ka taiew ban wan lane haba kut jong une u bnai.
“Ngi dang ap ban ioh ia ka jingpynthikna hynrei ka Sorkar MDA kan sa pan por ban iakynduh ia u Myntri kam Pohiing ban iakren halor kine ki ishu ba dang sahteng jong ka Jylla” ong u Bah Prestone.
Ha ka sngi palei, ki Nongialam jong ki san sengbhalang- HYC, EJNC, JSM, HANM and CORP – kila iakynduh ia u Symbud Myntri Rangbah bad pynpaw ia ka jingsngewkhia halor ka jingpynslem jong ka Sorkar Pdeng ban pyntreikam ia ka ILP bad pynrung ia ka ktien Khasi ha ka khyrnit ba phra ka Riti Synshar ka Ri.
U pyntip ba ka Sorkar kan rah iakren ruh ia ka kam halor ka Meghalaya Residents, Safety and Security (Amendment) Bill, 2020 kaba dang sahteng ha ka Ministry of Home Affairs ban ai ia ka rai.
U Bah Prestone u la kular ia ka kynhun ba ka Sorkar Jylla kala kut jingmut ban iai buddien bad ka Sorkar Pdeng ba kan ai rai halor kine ki kam kiba la dep ruh ban mynjur da ka Iingdorbar Thaw Ain ha ka dur jong ka Resolution.
“Nga la kyntu ruh ia ki (Sengbhalang) ba ki dei ban iakynduh biang ia u Myntri kam Pohiing bad ai ba ki ruh kin pynbor ia ka Sorkar India ba kan ai jingmynjur noh ia kine ki jingdawa kham kloi kat kaba lah” ula bynrap.
Halor ka jingkynthoh u Myntri ka Tnad Ain ka Ri u Kiren Rijiju ba ong ba ka Meghalaya ka donkam ban ioh bun ki MLA ka BJP ban kin tynruh bha ia ki jingdwa, u Bah Prestone ula ong kane ka jingkren ka dei kaba khlem khlem pyrkhat.
