SHILLONG, Naiwieng 04: Ka seng Hynñiewtrep Integrated Territorial Organization (HITO) hynne ka sngi kala kyntu ia u Lamphang ka ing dorbar ban khot daka dorbar kyrpang ban iakren halor ka ain khalai ka Meghalaya Gambling Act 2021.
Haka jingiakynduh ia u Lamphang, ka seng HITO kala aiti daka dorkhas ka ba kdew ba ka la donkam palat ban pynlong daka dorbar kyrpang ban iathir sani bha halor ka ain Meghalaya Gambling Act 2021.
“Ka seng ka sngew ban pynpaw ba ka la donkam palat iaka jylla ban don noh shwa daka Dorbar kyrpang ban iatai halor ka ain khalai lane ka Meghalaya gambling Act 2021 namar kane kadei ka ain ba ktah iaka imlang sahlang jong ki paidbah bad ka jylla Meghalaya baroh kawei” la ong ka dorkhas.
Ka dorkhas ka kren ruh ba ki paidbah nong shong shnong ka jylla Meghalaya ki kwah ban shai iaka nongrim ba ka sorkar ka ieng halor ka ain Meghalaya Gambling Act 2021 bad dei namar kane ka seng ka kyntu ban don noh daka dorbar kyrpang ban iakren halor kane.
U president ka HITO u samla Donbok Dkhar u la ong ba ka seng ka ai por haduh ka 24 tarik Naiwieng ban khot dorbar kyrpang naka bynta ka ain Khalai bad lada u Lamphang um khot iaka dorbar ka seng kan pynthud iaka Tamasa Cherry Blossom.
U bah Donbok u la ong ba ka sorkar ha ka jaka ban pynlut ia ka pisa ha ka tamasa bym ai jingmyntoi ia u paidbah ka dei ban siew noh ia ki Scholarship ki samla pule ne siew tulop ia ki nongtrei ka koit ka khiah kiba lah ban duh tulop kumba la mih ha ki lad pathai khubor.
